വൻകൂവർ: കാനഡയിലെ ബ്രിട്ടീഷ് കൊളംബിയയിലെ മെട്രോ വൻകൂവറിലുള്ള ബെൽക്കാര റീജനൽ പാർക്കിൽ ബുധനാഴ്ച ഉണ്ടായ കാട്ടുതീ സമീപത്തെ ആൻമോർ ഗ്രാമത്തിൽ അടിയന്തര ഒഴിപ്പിക്കലിനും ജാഗ്രതാ നിർദേശത്തിനും ഇടയാക്കി. ജനപ്രിയ വിനോദസഞ്ചാര കേന്ദ്രമായ സസാമറ്റ് തടാകത്തിലെ വൈറ്റ് പൈൻ ബീച്ചിൽ നിന്ന് ഏകദേശം ഒരു കിലോമീറ്റർ തെക്കുകിഴക്കായാണ് തീപിടിത്തമുണ്ടായത്.
ഫേൺ ഡ്രൈവിലെ രണ്ട് വീടുകളിലുള്ളവരെ അഗ്നിരക്ഷാസേന സുരക്ഷിതമായി ഒഴിപ്പിച്ചു. പിന്നീട് സ്ഥിതി വിലയിരുത്തിയ അധികൃതർ 35 വീടുകൾക്കായി എവാക്വേഷൻ അലർട്ട് പ്രഖ്യാപിച്ചു. ഫേൺ ഡ്രൈവ്, ഓക്ക് കോർട്ട്, ക്രിസ്റ്റൽ ക്രീക്ക് ഡ്രൈവ് എന്നിവിടങ്ങളിലെ താമസക്കാരോടാണ് ഏത് നിമിഷവും ഒഴിഞ്ഞുമാറാൻ തയ്യാറായിരിക്കണമെന്ന് നിർദേശിച്ചിരിക്കുന്നത്.
തീ നിയന്ത്രണവിധേയമാക്കാൻ ബി.സി വൈൽഡ്ഫയർ സർവീസ്, മെട്രോ വൻകൂവർ അഗ്നിരക്ഷാസേന, സസാമറ്റ് ഫയർ ഡിപ്പാർട്ട്മെന്റ്, പോർട്ട് മൂഡി ഫയർ ഡിപ്പാർട്ട്മെന്റ്, സന്നദ്ധപ്രവർത്തകർ എന്നിവരുടെ സംയുക്ത സംഘം രംഗത്തുണ്ട്. ഹെലികോപ്റ്ററുകൾ ഉപയോഗിച്ച് തടാകത്തിൽ നിന്ന് വെള്ളം ശേഖരിച്ച് തീ അണയ്ക്കാനുള്ള ശ്രമങ്ങളും തുടരുകയാണ്.
കാട്ടുതീയുടെ പശ്ചാത്തലത്തിൽ സമീപത്തെ ബണ്ട്സൻ ലേക്ക് വിനോദസഞ്ചാര മേഖല താൽക്കാലികമായി അടച്ചതായി ബി.സി ഹൈഡ്രോ അറിയിച്ചു. ഹെലികോപ്റ്ററുകൾ വെള്ളം ശേഖരിക്കുന്നതിനിടെ തടാകത്തിലും സമീപ പ്രദേശങ്ങളിലും ആളുകൾ എത്തരുതെന്ന് അധികൃതർ മുന്നറിയിപ്പ് നൽകി.
വൈകുന്നേരത്തോടെ തീയുടെ വ്യാപ്തി ഏകദേശം 1.5 ഹെക്ടറാണെന്ന് ബി.സി വൈൽഡ്ഫയർ സർവീസ് അറിയിച്ചു. ആദ്യം വൈദ്യുതി ലൈനുകൾ പ്രവർത്തനസജ്ജമായിരുന്നതിനാൽ അഗ്നിരക്ഷാസേനയ്ക്ക് നേരിട്ട് സ്ഥലത്തെത്താൻ സാധിച്ചിരുന്നില്ല. തുടർന്ന് ബി.സി. ഹൈഡ്രോ വൈദ്യുതി വിച്ഛേദിച്ചതോടെ ഗ്രൗണ്ട് ക്രൂവിന് തീ അണയ്ക്കൽ പ്രവർത്തനങ്ങളിൽ നേരിട്ട് പങ്കെടുക്കാനായി.
ബുധനാഴ്ച വൈകുന്നേരത്തോടെ 40 ഓളം അഗ്നിരക്ഷാസേനാംഗങ്ങൾ സ്ഥലത്ത് തീ നിയന്ത്രണവിധേയമാക്കാനുള്ള ശ്രമങ്ങൾ തുടരുകയായിരുന്നു. നിലവിൽ കാറ്റിന്റെ വേഗം കുറവായതിനാൽ തീ കൂടുതൽ വ്യാപിക്കാനുള്ള സാധ്യത കുറഞ്ഞതും അഗ്നിരക്ഷാ പ്രവർത്തനങ്ങൾക്ക് അനുകൂലമായ സാഹചര്യമാണെന്നും അധികൃതർ അറിയിച്ചു.
