വിന്സര്: വിന്സറിനെയും (Windsor, Ont.) ഡെട്രോയിറ്റിനെയും (Detroit) ബന്ധിപ്പിക്കുന്ന പുതിയ ഗോര്ഡി ഹൗവ ഇന്റര്നാഷണല് പാലത്തിലൂടെ
റെക്കോര്ഡ് ഗതാഗതം. പ്രവര്ത്തനം ആരംഭിച്ച ആദ്യ മാസത്തില് തന്നെ 3,40,000 വാഹനങ്ങള് കടന്ന് പോയതായി പുതിയ കണക്കുകള് വ്യക്തമാക്കുന്നു. ബ്രിഡ്ജ് ആന്ഡ് ടണല് ഓപ്പറേറ്റേഴ്സ് അസോസിയേഷന്റെ വിവരങ്ങള് അനുസരിച്ച് ഓഗസ്റ്റില് 3,43,507 വാഹനങ്ങളാണ് ഈ പുതിയ പാലം വഴി കടന്നുപോയത്.
അടുത്തുള്ള അംബാസഡര് ബ്രിഡ്ജിലെ (Ambassador Bridge) ആകെ ഗതാഗതത്തിന് തൊട്ടടുത്താണ് ഈ സംഖ്യ. കഴിഞ്ഞ മാസം 3,45,445 വാഹനങ്ങളാണ് അംബാസഡര് ബ്രിഡ്ജ് വഴി കടന്നുപോയത്.
എന്നാല് ഇരു പാലങ്ങളിലൂടെയും സഞ്ചരിച്ച വാഹനങ്ങളുടെ തരത്തില് വലിയ വ്യത്യാസമുണ്ട്:
ഗോര്ഡി ഹോവ് ബ്രിഡ്ജ്: ഭൂരിഭാഗവും യാത്രാ വാഹനങ്ങളായിരുന്നു (Passenger vehicles). ഏകദേശം 2,70,000 യാത്രാ വാഹനങ്ങളും 74,000 ട്രക്കുകളും ഇതിലൂടെ കടന്നുപോയി.
അംബാസഡര് ബ്രിഡ്ജ്: 1,50,000 ട്രക്കുകളും 1,96,000 യാത്രാ വാഹനങ്ങളുമാണ് ഇതിലൂടെ സഞ്ചരിച്ചത്.
വിന്സര്-ഡെട്രോയിറ്റ് ടണല്: ഏറ്റവും കൂടുതല് യാത്രാ വാഹനങ്ങള് സഞ്ചരിച്ചത് ഇതുവഴിയാണ് (ഓഗസ്റ്റില് ഏകദേശം 2,80,000 വാഹനങ്ങള്).
ട്രക്കിങ് കമ്പനികള്ക്ക് അംബാസഡര് ബ്രിഡ്ജ് അധികൃതരുമായി മുന്കൂട്ടി നിശ്ചയിച്ച ടോള് കരാറുകള് ഉള്ളതിനാലാണ് പല കമ്പനികളും പുതിയ പാലത്തിലേക്ക് ഉടനടി മാറാതിരുന്നതെന്ന് മിഷിഗണ് സ്റ്റേറ്റ് യൂണിവേഴ്സിറ്റിയിലെ സപ്ലൈ ചെയിന് പ്രൊഫസറായ ജേസണ് മില്ലര് ചൂണ്ടിക്കാട്ടി. ഈ വര്ഷത്തെ കരാറുകള് പൂര്ത്തിയാകുന്നതോടെയോ പുതിയ നിരക്കുകള് തീരുമാനിക്കുന്നതോടെയോ മാത്രമായിരിക്കും കൂടുതല് ട്രക്കുകള് ഗോര്ഡി ഹോവിലേക്ക് മാറുക.
സ്റ്റാറ്റിസ്റ്റിക്സ് കാനഡയുടെ കണക്കുകള് പ്രകാരം ഓഗസ്റ്റില് 1,34,900 കനേഡിയന് നിവാസികളും 1,01,000 യു.എസ് നിവാസികളും ഗോര്ഡി ഹോവ് പാലം വഴി യാത്ര ചെയ്തു. ഇതില് പകുതിയിലധികവും ഒരേ ദിവസത്തെ (same-day) യാത്രകളായിരുന്നു.
പുതിയ പാലത്തിന്റെ ആകര്ഷണം കുറയുന്നതോടെ വരുന്ന മാസങ്ങളില് വാഹനങ്ങളുടെ എണ്ണത്തില് മാറ്റങ്ങള് ഉണ്ടായേക്കാം. എങ്കിലും ആദ്യ മാസത്തില് തന്നെ ഉയര്ന്ന ഗതാഗതം രേഖപ്പെടുത്തിയത് വിന്സര്-ഡെട്രോയിറ്റ് പാതയില് രണ്ടാമതൊരു പാലത്തിന്റെ ആവശ്യകത വ്യക്തമാക്കുന്നതാണെന്നും വ്യാപാര മേഖലയ്ക്ക് ഇത് കൂടുതല് ഗുണകരമാകുമെന്നും വിദഗ്ദ്ധര് വിലയിരുത്തുന്നു.
