പാരിസ്: ലോക രാഷ്ട്രീയത്തിന്റെ ശ്രദ്ധാകേന്ദ്രമായ അമേരിക്ക–ഇറാൻ ബന്ധത്തിൽ നിർണായക വഴിത്തിരിവുണ്ടായെന്ന സൂചനകൾക്കിടെ, ഇരു രാജ്യങ്ങളും സമാധാന ധാരണാപത്രത്തിൽ ഡിജിറ്റലായി ഒപ്പുവെച്ചു. അമേരിക്കൻ വൈസ് പ്രസിഡന്റ് ജെ.ഡി. വാൻസിന്റെ വെളിപ്പെടുത്തലിനെ തുടർന്നാണ് ഈ വിവരം പുറത്തുവന്നത്. അതീവ രഹസ്യമായി സൂക്ഷിച്ചിരിക്കുന്ന ധാരണാപത്രത്തിൽ ജൂൺ 19-ന് സ്വിറ്റ്സർലൻഡിലെ ജനീവയിൽ ഔദ്യോഗികമായി ഒപ്പുവെക്കും.
എന്നാൽ, ഇത് അന്തിമ സമാധാന കരാറല്ലെന്ന് ഇറാൻ വ്യക്തമാക്കിയിട്ടുണ്ട്. ഹോർമൂസ് കടലിടുക്ക് പൂർണമായി തുറന്നുനൽകുന്ന കാര്യം, ആണവപരിപാടിയുമായി ബന്ധപ്പെട്ട നിയന്ത്രണങ്ങൾ, സമ്പുഷ്ടീകരിച്ച യുറേനിയം ശേഖരത്തിന്റെ ഭാവി, അമേരിക്കൻ ഉപരോധങ്ങൾ പിൻവലിക്കുന്ന രീതി തുടങ്ങിയ വിഷയങ്ങളിൽ ഇപ്പോഴും ചില അവ്യക്തതകൾ നിലനിൽക്കുന്നതായാണ് റിപ്പോർട്ടുകൾ. ഈ വിഷയങ്ങളിൽ കൂടുതൽ ചർച്ചകൾ നടക്കുമെന്നാണ് സൂചന.
ഇതിനിടെ, ജി7 ഉച്ചകോടിയിൽ പങ്കെടുക്കാനായി അമേരിക്കൻ പ്രസിഡന്റ് ഡോണാൾഡ് ട്രംപ് ഫ്രാൻസിലെത്തി. ഫ്രഞ്ച് പ്രസിഡന്റ് ഇമ്മാനുവൽ മാക്രോണുമായി അദ്ദേഹം കൂടിക്കാഴ്ച നടത്തി. ഉച്ചകോടിക്കിടെ മറ്റ് ലോകനേതാക്കളുമായും ട്രംപ് ചർച്ചകൾ നടത്തും.
ഇന്ത്യൻ പ്രധാനമന്ത്രി നരേന്ദ്ര മോദിയുമായുള്ള കൂടിക്കാഴ്ചയാണ് ഉച്ചകോടിയിലെ പ്രധാന ആകർഷണങ്ങളിലൊന്ന്. നാളെ നടക്കുന്ന മോദി–ട്രംപ് കൂടിക്കാഴ്ചയിൽ ഇന്ത്യ–അമേരിക്ക വ്യാപാര കരാർ, അമേരിക്കയുടെ തീരുവ നയം, H-1B വീസ നിയന്ത്രണങ്ങൾ, ഊർജസുരക്ഷ, പശ്ചിമേഷ്യയിലെ സുരക്ഷാ സാഹചര്യം തുടങ്ങിയ വിഷയങ്ങൾ ചർച്ചയാകുമെന്നാണ് വിലയിരുത്തൽ.
പശ്ചിമേഷ്യയിലെ സംഘർഷാവസ്ഥയും ആഗോള എണ്ണവിതരണ ശൃംഖലയെ ബാധിക്കുന്ന പ്രത്യാഘാതങ്ങളും ഇന്ത്യയുടെ പ്രധാന ആശങ്കകളിലൊന്നാണ്. അതിനാൽ മേഖലയിൽ സമാധാനം പുനഃസ്ഥാപിക്കേണ്ടതിന്റെ ആവശ്യകത മോദി ട്രംപിനെ അറിയിക്കാനിടയുണ്ടെന്നാണ് നയതന്ത്ര വൃത്തങ്ങൾ പറയുന്നത്.
സമീപകാലത്ത് തീരുവ തർക്കങ്ങളും റഷ്യൻ എണ്ണ ഇറക്കുമതിയുമായി ബന്ധപ്പെട്ട അഭിപ്രായവ്യത്യാസങ്ങളും ഉണ്ടായിരുന്നെങ്കിലും, ഇരുരാജ്യങ്ങളും സാമ്പത്തിക-വ്യാപാര സഹകരണം കൂടുതൽ ശക്തിപ്പെടുത്തുന്നതിനുള്ള സാധ്യതകൾ ചർച്ച ചെയ്യുമെന്നാണ് പ്രതീക്ഷ. 16 മാസങ്ങൾക്ക് ശേഷമാണ് മോദിയും ട്രംപും നേരിട്ട് കൂടിക്കാഴ്ച നടത്തുന്നത്.
