നോവസ്കോഷ: ഹാലിഫാക്സില് താങ്ങാനാവുന്ന നിരക്കില് ഹോട്ടല് മുറികള് കണ്ടെത്തുക ഇപ്പോള് പ്രയാസമാണ്. നഗരത്തിലെ ഹോട്ടല് മുറികളുടെ വാടക നിരക്ക് കുത്തനെ കൂട്ടിയിരിക്കുകയാണ് ഹോട്ടലുടമകള്. നഗരത്തില് ഒരു ദിവസം താമസിക്കണമെങ്കില് 400 മുതല് 700 ഡോളര് വരെയാണ് ബുക്കിങ് സൈറ്റുകളില് ഈടാക്കുന്നത്.
ഡൗണ്ടൗണ് ഡാര്ട്ട്മൗത്ത് ബിസിനസ്സ് കമ്മീഷന് സിഇഒ ടിം റിസെസ്കോ ഈ വിഷയത്തില് ആശങ്ക രേഖപ്പെടുത്തി. ഹോട്ടല് നിരക്കുകളെക്കുറിച്ച് സന്ദര്ശകരില് നിന്ന് നിരന്തരം പരാതികള് ലഭിക്കുന്നുണ്ടെന്ന് അദ്ദേഹം പറഞ്ഞു. പലരും ഒരു രാത്രിക്ക് 300 മുതല് 400 ഡോളര് വരെ നല്കേണ്ടി വരുന്നതായി പരാതിപ്പെടുന്നു. ഹോട്ടലുകളുടെ എണ്ണം വര്ധിക്കുകയാണെങ്കില് മാത്രമേ നിരക്കുകളില് കുറവുണ്ടാകൂ എന്ന് അദ്ദേഹം കൂട്ടിച്ചേര്ത്തു. ഡാര്ട്ട്മൗത്ത് ഭാഗത്ത് കൂടുതല് ഹോട്ടലുകള് വരണമെന്നാണ് അദ്ദേഹം ആഗ്രഹിക്കുന്നത്. നിലവില് ബേണ്സൈഡ്, ഡാര്ട്ട്മൗത്ത് ക്രോസിങ്, എയര്പോര്ട്ട് പരിസരം എന്നിവിടങ്ങളില് ഹോട്ടലുകള് ഉണ്ടെങ്കിലും ഡൗണ്ടൗണ് ഡാര്ട്ട്മൗത്തില് ഹോട്ടലുകള് ലഭ്യമല്ല.
കഴിഞ്ഞ അഞ്ച് വര്ഷത്തിനിടയില് ഹാലിഫാക്സ് ഡൗണ്ടൗണില് അഞ്ച് പുതിയ ഹോട്ടലുകളാണ് നിര്മ്മിക്കപ്പെട്ടത്. നിലവില് ഹാലിഫാക്സ് മുനിസിപ്പാലിറ്റിയിലുടനീളം ആകെ 7,000 ഹോട്ടല് മുറികളാണുള്ളത്. വരും മാസങ്ങളായ ജൂലൈ, ഓഗസ്റ്റ് കാലയളവില് വിനോദസഞ്ചാരികളുടെ ഒഴുക്ക് ഇനിയും വര്ധിക്കുമെന്നാണ് കണക്കാക്കുന്നത്. അതുകൊണ്ടുതന്നെ വരും ദിവസങ്ങളില് ഹോട്ടല് മുറികളുടെ നിരക്ക് വീണ്ടും കുത്തനെ ഉയരാനാണ് സാധ്യത.
