തിരുവനന്തപുരം: യുഡിഎഫ് സർക്കാരിന്റെ ആദ്യ ബജറ്റ് അവതരണം ഇന്ന് നിയമസഭയിൽ ആരംഭിച്ചു. ധനവകുപ്പിന്റെ ചുമതലയുള്ള മുഖ്യമന്ത്രി വി ഡി സതീശനാണ് ബജറ്റ് അവതരിപ്പിച്ചത്. സംസ്ഥാനത്തിന്റെ സാമ്പത്തിക സ്ഥിതിയെക്കുറിച്ചുള്ള ഗൗരവമായ വിലയിരുത്തലോടെയാണ് ബജറ്റ് പ്രസംഗം തുടങ്ങിയത്.
കേരളത്തിന്റെ സാമ്പത്തിക സൂചികകൾ കഴിഞ്ഞ കുറച്ച് നാളുകളായി സ്തംഭനാവസ്ഥയിലാണെന്നും സംസ്ഥാനം കടുത്ത സാമ്പത്തിക വെല്ലുവിളികൾ നേരിടുകയാണെന്നും മുഖ്യമന്ത്രി ചൂണ്ടിക്കാട്ടി. നിലവിൽ സംസ്ഥാനത്തിന് 5.05 ലക്ഷം കോടി രൂപയുടെ കടബാധ്യതയുണ്ടെന്ന് അദ്ദേഹം വ്യക്തമാക്കി.
പ്രതീക്ഷിച്ച വരുമാനത്തിൽ ഏകദേശം 20,500 കോടി രൂപയുടെ കുറവുണ്ടായതും സംസ്ഥാന ധനകാര്യ മേഖലയെ പ്രതികൂലമായി ബാധിച്ചിട്ടുണ്ടെന്ന് മുഖ്യമന്ത്രി പറഞ്ഞു. സാമ്പത്തിക പ്രതിസന്ധികളെ അതിജീവിച്ച് വികസനവും ക്ഷേമപദ്ധതികളും മുന്നോട്ടുകൊണ്ടുപോകുന്നതിനുള്ള നടപടികൾ സർക്കാർ സ്വീകരിക്കുമെന്നും അദ്ദേഹം ഉറപ്പുനൽകി.
“പുതുയുഗ കേരളം” സൃഷ്ടിക്കുകയെന്നത് സർക്കാരിന്റെ പ്രധാന ലക്ഷ്യമാണെന്നും അതിനായി ധനകാര്യ അച്ചടക്കവും വികസന കാഴ്ചപ്പാടും ഒരുപോലെ മുന്നോട്ട് കൊണ്ടുപോകുമെന്നും മുഖ്യമന്ത്രി ബജറ്റ് പ്രസംഗത്തിൽ വ്യക്തമാക്കി.
ബജറ്റിൽ സാമ്പത്തിക പുനരുജ്ജീവനം, നിക്ഷേപ ആകർഷണം, തൊഴിലവസര സൃഷ്ടി, അടിസ്ഥാന സൗകര്യ വികസനം തുടങ്ങിയ മേഖലകൾക്ക് പ്രത്യേക പ്രാധാന്യം ലഭിക്കുമെന്നാണ് പ്രതീക്ഷിക്കുന്നത്. ബജറ്റിലെ പ്രഖ്യാപനങ്ങളും പദ്ധതികളും സംബന്ധിച്ച കൂടുതൽ വിവരങ്ങൾ അവതരണം പുരോഗമിക്കുന്നതിനനുസരിച്ച് ലഭ്യമാകും.
