ഓട്ടവ: ശനിയാഴ്ച താത്കാലികമായി നിര്ത്തിവെച്ച ഒ-ട്രെയിന് ലൈന് 4 സര്വീസുകള് പുനരാരംഭിച്ചു. ഒരു മാസത്തിനിടെ ഇത് രണ്ടാം തവണയാണ് ജീവനക്കാരുടെ ക്ഷാമം മൂലം ലൈന് 4 സര്വീസ് പൂര്ണ്ണമായി തടസ്സപ്പെടുന്നത്. ഇതിനുമുമ്പ് മെയ് 16-ലെ വാരാന്ത്യത്തിലും സമാനമായ രീതിയില് ട്രെയിന് സര്വീസുകള് നിര്ത്തിവെക്കേണ്ടി വന്നിരുന്നു.
സോഷ്യല് മീഡിയയിലൂടെയാണ് സൗത്ത് കീസ് സ്റ്റേഷനില് നിന്നുള്ള സര്വീസുകള് നിര്ത്തിവെച്ചതായും പകരം റൂട്ട് 105 ബസുകള് സര്വീസ് നടത്തുമെന്നും അറിയിച്ചത്. മണിക്കൂറുകളോളം ട്രെയിന് ഗതാഗതം പൂര്ണ്ണമായി തടസ്സപ്പെട്ടെങ്കിലും വൈകുന്നേരം നാല് മണിയോടെ സാധാരണ നിലയിലുള്ള ട്രെയിന് സര്വീസുകള് പുനഃസ്ഥാപിക്കാന് കഴിഞ്ഞതായി അധികൃതര് വ്യക്തമാക്കി.
ജീവനക്കാരുടെ കുറവ് പരിഹരിക്കുന്നതിന്റെ ഭാഗമായി ഈ വേനല്ക്കാലത്ത് ലൈന് 4-ല് വാരാന്ത്യ സര്വീസുകളുടെ എണ്ണം പകുതിയായി കുറയ്ക്കുമെന്ന് ഒസി ട്രാന്സ്പോ ജനറല് മാനേജര് റിക്ക് ലിയറി വെള്ളിയാഴ്ച പ്രഖ്യാപിച്ചിരുന്നു. ഇതനുസരിച്ച് ഇനി മുതല് ഓരോ 12 മിനിറ്റിലും ഓടിക്കൊണ്ടിരുന്ന ട്രെയിനുകള്ക്ക് പകരം 24 മിനിറ്റ് ഇടവിട്ടായിരിക്കും സര്വീസുകള് ലഭ്യമാകുക.
