കാരക്കാസ്: വെനസ്വേലയെ നടുക്കിയ ഇരട്ട ഭൂചലനത്തിൽ മരണസംഖ്യ ഉയരുന്നു. ഇതുവരെ 235 മൃതദേഹങ്ങൾ കണ്ടെത്തി. തകർന്ന കെട്ടിടങ്ങളുടെ അവശിഷ്ടങ്ങൾക്കടിയിൽ 200-ലധികം പേർ കുടുങ്ങിക്കിടക്കുന്നതായാണ് പ്രാഥമിക നിഗമനം. 1,500-ലധികം പേർക്ക് പരുക്കേറ്റിട്ടുണ്ട്. പതിനായിരത്തിലേറെ പേരെ ഇതുവരെ കണ്ടെത്താനായിട്ടില്ലെന്ന് റിപ്പോർട്ടുകൾ സൂചിപ്പിക്കുന്നു. മരണസംഖ്യ ഇനിയും ഉയരാൻ സാധ്യതയുണ്ടെന്നാണ് വിലയിരുത്തൽ.
ബുധനാഴ്ച വൈകുന്നേരം മിനിറ്റുകളുടെ ഇടവേളയിൽ റിക്ടർ സ്കെയിലിൽ 7.2, 7.5 തീവ്രത രേഖപ്പെടുത്തിയ രണ്ട് ഭൂചലനങ്ങളാണ് രാജ്യത്ത് വൻ നാശനഷ്ടമുണ്ടാക്കിയത്. കഴിഞ്ഞ ഒരു നൂറ്റാണ്ടിനിടയിലെ ഏറ്റവും ശക്തമായ ഭൂചലനങ്ങളിലൊന്നായാണ് ഇതിനെ വിലയിരുത്തുന്നത്. 200-ലധികം ബഹുനില കെട്ടിടങ്ങൾ തകർന്നതായി പ്രാഥമിക കണക്കുകൾ വ്യക്തമാക്കുന്നു. ഹോട്ടലുകൾ ഉൾപ്പെടെ നിരവധി പ്രധാന കെട്ടിടങ്ങൾ നിലംപതിച്ചു.
രക്ഷാപ്രവർത്തനത്തിന് മുൻഗണന നൽകിക്കൊണ്ട് കെട്ടിടാവശിഷ്ടങ്ങൾക്കടിയിൽ ജീവനോടെ കുടുങ്ങിക്കിടക്കുന്നവരെ കണ്ടെത്താനുള്ള ശ്രമങ്ങൾ തുടരുകയാണ്. രക്ഷാസംഘങ്ങളും സന്നദ്ധപ്രവർത്തകരും ദുരന്തബാധിത മേഖലകളിൽ വ്യാപകമായി തിരച്ചിൽ നടത്തുകയാണ്.
തലസ്ഥാനമായ കാരക്കാസിന് വടക്കുള്ള തീരപ്രദേശമായ ലാ ഗൈറയിലാണ് ഏറ്റവും കൂടുതൽ നാശനഷ്ടമുണ്ടായത്. പ്രദേശത്തെ വിമാനത്താവളത്തിന് കേടുപാടുകൾ സംഭവിച്ചതിനെ തുടർന്ന് രക്ഷാപ്രവർത്തനങ്ങൾ ദുഷ്കരമായിരിക്കുകയാണ്. കെട്ടിടാവശിഷ്ടങ്ങൾക്കടിയിൽ നിന്ന് ജീവനക്കാരെയും വളർത്തുമൃഗങ്ങളെയും രക്ഷപ്പെടുത്തുന്ന ദൃശ്യങ്ങൾ വ്യാപകമായി പുറത്തുവരുന്നുണ്ട്.
ദുരന്തത്തെ തുടർന്ന് വെനസ്വേലയിൽ അടിയന്തരാവസ്ഥ പ്രഖ്യാപിച്ചിട്ടുണ്ട്. തകർന്ന ആശുപത്രികളും വീടുകളും പുനർനിർമിക്കുന്നതിനായി 200 മില്യൺ ഡോളറിന്റെ പ്രത്യേക ഫണ്ട് രൂപീകരിക്കുമെന്ന് ഭരണകൂടം അറിയിച്ചു.അമേരിക്ക, മെക്സിക്കോ, ബ്രസീൽ, ഖത്തർ, കാനഡ, സ്പെയിൻ, പോർച്ചുഗൽ തുടങ്ങിയ രാജ്യങ്ങൾ രക്ഷാപ്രവർത്തനത്തിനും ദുരിതാശ്വാസത്തിനുമായി സഹായം വാഗ്ദാനം ചെയ്തിട്ടുണ്ട്. തിരച്ചിൽ സംഘങ്ങൾ, പരിശീലനം ലഭിച്ച നായകൾ, മെഡിക്കൽ സാമഗ്രികൾ, ഡ്രോണുകൾ, കുടിവെള്ള ശുദ്ധീകരണ ഉപകരണങ്ങൾ എന്നിവ ദുരന്തമേഖലയിലേക്ക് എത്തിച്ചുകൊണ്ടിരിക്കുകയാണ്. അമേരിക്ക 150 മില്യൺ ഡോളറിന്റെ അടിയന്തര സഹായവും പ്രഖ്യാപിച്ചിട്ടുണ്ട്.
