കൊച്ചി: ലഹരിക്കെതിരായ ‘ഓപ്പറേഷൻ തൂഫാൻ: ദ നാർകോ ഹണ്ട്’ പ്രവർത്തനങ്ങൾക്ക് ഗുണ്ടകളുടെയോ ക്രിമിനൽ പശ്ചാത്തലമുള്ളവരുടെയോ സഹായം ആവശ്യമില്ലെന്ന് കൊച്ചി സിറ്റി പൊലീസ് കമ്മീഷണർ. നിയമപരമായ മാർഗങ്ങളിലൂടെ തന്നെ ലഹരിമാഫിക്കെതിരെ ശക്തമായ നടപടി തുടരുമെന്നും അദ്ദേഹം വ്യക്തമാക്കി.
കൊച്ചിയിൽ കോൺഗ്രസ് നേതാവ് കെ സുധാകരൻ എംപി വിളിച്ച ലഹരിവിരുദ്ധ യോഗത്തിൽ ക്രിമിനൽ പശ്ചാത്തലമുള്ളവർ പങ്കെടുത്തെന്ന ആരോപണത്തെ തുടർന്നാണ് കമ്മീഷണറുടെ പ്രതികരണം. സംഭവവുമായി ബന്ധപ്പെട്ട് ഇതുവരെ പ്രത്യേക അന്വേഷണം ആരംഭിച്ചിട്ടില്ലെന്നും അദ്ദേഹം അറിയിച്ചു.
കെ സുധാകരൻ വിളിച്ച യോഗത്തിൽ നിരവധി ഗുണ്ടാസംഘങ്ങളുമായി ബന്ധമുള്ളവരും വിവിധ ക്രിമിനൽ കേസുകളിലെ പ്രതികളും പങ്കെടുത്തതായി ആരോപണമുണ്ട്. കള്ളത്തോക്ക് വിൽപ്പനയ്ക്ക് ശ്രമിച്ച കേസിലെ പ്രതികളും എകെജി സെന്റർ ആക്രമണക്കേസിലെ രണ്ടാം പ്രതി സുഹൈൽ ഷാജഹാനും യോഗത്തിൽ ഉണ്ടായിരുന്നുവെന്ന ആരോപണവും ഉയർന്നിട്ടുണ്ട്.
‘ഓപ്പറേഷൻ തൂഫാൻ’ പദ്ധതിയുടെ ഭാഗമായി ചെറുപ്പക്കാരുടെ കൂട്ടായ്മ എന്ന പേരിലാണ് യോഗം സംഘടിപ്പിച്ചതെന്നാണ് വിവരം. യുവാക്കളെ അണിനിരത്തി ലഹരിമാഫിക്കെതിരെ സാമൂഹിക മുന്നേറ്റം സൃഷ്ടിക്കുകയാണ് ലക്ഷ്യമെന്ന് കെ സുധാകരൻ നേരത്തെ വ്യക്തമാക്കിയിരുന്നു. അതേസമയം, യോഗത്തിൽ ക്രിമിനൽ പശ്ചാത്തലമുള്ളവർ പങ്കെടുത്തെന്ന ആരോപണം രാഷ്ട്രീയ വിവാദത്തിനും വഴിവെച്ചിരിക്കുകയാണ്.
