നയതന്ത്ര ബന്ധം ശക്തമാക്കാന്‍ കാനഡ; മന്ത്രിമാര്‍ അടുത്ത ആഴ്ച ഇന്ത്യയിലേക്ക്

ഓട്ടവ: ഇന്ത്യയും കാനഡയും തമ്മിലുള്ള സാമ്പത്തിക വ്യാപാര കരാര്‍ ശക്തിപ്പെടുത്തുന്നതിന്റെ ഭാഗമായി രണ്ട് പ്രമുഖ കനേഡിയന്‍ മന്ത്രിമാര്‍ അടുത്ത ആഴ്ച ഇന്ത്യ സന്ദര്‍ശിക്കും. കനേഡിയന്‍ വിദേശകാര്യ മന്ത്രി അനിത ആനന്ദ്, വ്യാപാര മന്ത്രി മനിന്ദര്‍ സിദ്ധു എന്നിവരാണ് ഇന്ത്യയിലെത്തുന്നത്. സന്ദര്‍ശനവേളയില്‍ അനിത ആനന്ദ് ഇന്ത്യന്‍ വിദേശകാര്യ മന്ത്രി എസ്. ജയശങ്കറുമായും മനിന്ദര്‍ സിദ്ധു കേന്ദ്ര വാണിജ്യ മന്ത്രി പീയൂഷ് ഗോയലുമായും ഉഭയകക്ഷി ചര്‍ച്ചകള്‍ നടത്തും. ഇരുമന്ത്രിമാരും പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്താനും സാധ്യതയുണ്ട്.

ടീം കാനഡ ട്രേഡ് മിഷന്‍

വ്യാപാര മന്ത്രി മനിന്ദര്‍ സിദ്ധുവിന്റെ നേതൃത്വത്തില്‍ 300-ഓളം പ്രതിനിധികളടങ്ങുന്ന ‘ടീം കാനഡ ട്രേഡ് മിഷന്‍’ ഒക്ടോബര്‍ 12 മുതല്‍ 17 വരെ മുംബൈ, ബെംഗളൂരു നഗരങ്ങള്‍ സന്ദര്‍ശിക്കും. കഴിഞ്ഞ 30 വര്‍ഷത്തിനിടെ കാനഡ ഇന്ത്യയിലേക്ക് അയക്കുന്ന ഏറ്റവും വലിയ വ്യാപാര പ്രതിനിധി സംഘമാണിത്. എയറോസ്‌പേസ്, ക്ലീന്‍ ടെക്‌നോളജി, ഇന്‍ഫര്‍മേഷന്‍ ആന്‍ഡ് കമ്മ്യൂണിക്കേഷന്‍, ലൈഫ് സയന്‍സസ്, അഗ്രി-ഫുഡ് തുടങ്ങിയ മേഖലകളില്‍ നിന്നുള്ള പ്രമുഖ വ്യവസായികള്‍ ഈ സംഘത്തിലുണ്ട്.

2030-ഓടെ ഇന്ത്യയുമായുള്ള ഉഭയകക്ഷി വ്യാപാരം 70 ശതകോടി ഡോളറായി (70 Billion USD) ഉയര്‍ത്തുകയാണ് കാനഡ ലക്ഷ്യമിടുന്നത്. സമഗ്ര സാമ്പത്തിക പങ്കാളിത്ത കരാര്‍ (CEPA) ഈ വര്‍ഷാവസാനത്തോടെ പൂര്‍ത്തിയാക്കാനുള്ള ശ്രമങ്ങള്‍ പുരോഗമിക്കുകയാണ്.

മോദിയുടെ കാനഡ സന്ദര്‍ശനവും റിപ്പബ്ലിക് ദിന ക്ഷണവും

ഡിസംബറില്‍ യു.എസ്.എയിലെ ഫ്‌ലോറിഡയില്‍ നടക്കാനിരിക്കുന്ന ജി-20 ഉച്ചകോടിക്ക് (G-20 Summit) മുന്നോടിയായി പ്രധാനമന്ത്രി നരേന്ദ്ര മോദി കാനഡ സന്ദര്‍ശിക്കുമെന്നാണ് കരുതപ്പെടുന്നത്. ഉഭയകക്ഷി ചര്‍ച്ചകളും വ്യാപാര കരാറുകളും വിജയകരമായി പൂര്‍ത്തിയായാല്‍, 2027 ജനുവരി 26-ന് നടക്കുന്ന ഇന്ത്യയുടെ റിപ്പബ്ലിക് ദിനാഘോഷത്തില്‍ കനേഡിയന്‍ പ്രധാനമന്ത്രി മാര്‍ക്ക് കാര്‍നിയെ (Mark Carney) മുഖ്യാതിഥിയായി ക്ഷണിച്ചേക്കുമെന്നും ഔദ്യോഗിക വൃത്തങ്ങള്‍ സൂചിപ്പിക്കുന്നു.