എഡ്മിന്റൻ: ആൽബർട്ടയിലെ വെയ്ൻറൈറ്റ് സൈനിക താവളത്തിലുണ്ടായ തീപിടിത്തത്തിൽ നാല് സൈനികർ മരിക്കുകയും 39 പേർക്ക് പരുക്കേൽക്കുകയും ചെയ്ത സംഭവത്തിൽ ദുരിതബാധിതർക്ക് സഹായവുമായി ജനങ്ങൾ രംഗത്ത്. പരുക്കേറ്റവർക്കായി നിരവധി പേരാണ് ആശുപത്രിയിൽ രക്തദാനം നടത്തിയത്. ജനങ്ങൾ രക്ഷാപ്രവർത്തകർക്കായി ഭക്ഷണം എത്തിക്കുകയും ദുരിതബാധിതരായ കുടുംബങ്ങൾക്ക് താമസസൗകര്യം ഒരുക്കുകയും ചെയ്തതായി പ്രതിരോധ മന്ത്രി ഡേവിഡ് മക്ഗിന്റി അറിയിച്ചു.
എഡ്മിന്റണിന് തെക്കുകിഴക്കായി ഏകദേശം 200 കിലോമീറ്റർ അകലെയുള്ള സി.എഫ്.ബി വെയ്ൻറൈറ്റിലാണ് ശനിയാഴ്ച ദുരന്തമുണ്ടായത്. സൈനിക പരിശീലനത്തിനിടെ സമീപത്തെ പുൽമേട്ടിൽ പടർന്ന തീ ശക്തമായ കാറ്റിനെത്തുടർന്ന് അതിവേഗം പരിശീലന മേഖലയിലേക്ക് വ്യാപിക്കുകയായിരുന്നു. തീ പടർന്നതോടെ സൈനികർക്ക് രക്ഷപ്പെടാൻ ബുദ്ധിമുട്ടുണ്ടായതായി പ്രതിരോധ ഉദ്യോഗസ്ഥർ അറിയിച്ചു.
പ്രിൻസസ് പട്രീഷ്യാസ് കനേഡിയൻ ലൈറ്റ് ഇൻഫൻട്രിയിലെ 84 സൈനികരാണ് അപകടസമയത്ത് പരിശീലന മേഖലയിലുണ്ടായിരുന്നത്. ഇവരിൽ 39 പേരെ ആശുപത്രിയിൽ പ്രവേശിപ്പിച്ചു. 19 പേരുടെ നില ഗുരുതരമാണ്. എഡ്മിന്റൻ, കാൽഗറി, റെഡ് ഡിയർ എന്നിവിടങ്ങളിലെ ആശുപത്രികളിലാണ് പരുക്കേറ്റവർ ചികിത്സയിൽ കഴിയുന്നത്. പരുക്കേറ്റ പലർക്കും ഗുരുതരമായ പൊള്ളലേറ്റിട്ടുണ്ടെന്ന് ആൽബർട്ട പ്രീമിയർ ഡാനിയേൽ സ്മിത്ത് അറിയിച്ചു.
മരിച്ച സൈനികരെ തിരിച്ചറിഞ്ഞിട്ടുണ്ട്. എഡ്മിന്റണിൽ നിന്നുള്ള സർജന്റ് മോർഗൻ വോങ്, സസ്കാച്വാനിലെ പ്രിൻസ് ആൽബർട്ടിൽ നിന്നുള്ള പ്രൈവറ്റ് ഷോൺ ഫാരൽ, നോർത്ത് വൻകൂവറിൽ നിന്നുള്ള പ്രൈവറ്റ് എയ്ഡൻ ഗൗൾഡിങ്, ലാംഗ്ലിയിൽ നിന്നുള്ള പ്രൈവറ്റ് ഹെയ്ഡൻ ലൈക്ക്മാർക്ക് എന്നിവരാണ് മരിച്ചത്.
പരുക്കേറ്റവരെ സഹായിക്കാൻ സമീപപ്രദേശങ്ങളിൽനിന്ന് മെഡിക്കൽ സംഘങ്ങളെ എത്തിച്ചു. സസ്കാച്വാൻ ഉൾപ്പെടെയുള്ള പ്രദേശങ്ങളിൽനിന്നുള്ള ആരോഗ്യപ്രവർത്തകരും രക്ഷാപ്രവർത്തനത്തിൽ പങ്കെടുത്തു. കൂട്ടമരണങ്ങളും ഗുരുതര പരുക്കുകളും നേരിടേണ്ടിവരുന്ന സാഹചര്യങ്ങളിൽ ആശുപത്രികൾ സജ്ജമാകുന്നതിനായി പ്രഖ്യാപിച്ചിരുന്ന ‘കോഡ് ഓറഞ്ച്’ പിന്നീട് പിൻവലിച്ചു.
തീപ്പിടിത്തത്തെക്കുറിച്ച് സമഗ്രമായ അന്വേഷണം നടത്തുമെന്ന് ഒന്നാം കനേഡിയൻ ഡിവിഷൻ കമാൻഡർ മേജർ ജനറൽ വേഡ് റട്‌ലൻഡ് അറിയിച്ചു. തീ ഇത്രവേഗം പടരാൻ ശക്തമായ കാറ്റാണോ കാരണമായത്, അതോ സസ്യാവരണത്തിലൂടെ തീ ശ്രദ്ധയിൽപ്പെടാതെ പരിശീലന മേഖലയിലേക്ക് എത്തിയതാണോ, രണ്ടും ചേർന്നാണോ ദുരന്തമുണ്ടായത് തുടങ്ങിയ കാര്യങ്ങൾ അന്വേഷിക്കുമെന്ന് അദ്ദേഹം വ്യക്തമാക്കി.
പരിശീലന മേഖലയ്ക്ക് ഏകദേശം ഒരു കിലോമീറ്റർ അകലെയുണ്ടായിരുന്ന പുൽത്തീ നേരത്തേ ശ്രദ്ധയിൽപ്പെട്ടിരുന്നെങ്കിലും സൈനികർക്ക് ഭീഷണിയാകില്ലെന്നാണ് കരുതിയിരുന്നതെന്ന് സൈന്യം അറിയിച്ചു. പരിശീലനത്തിനിടെ മിക്ക സൈനികരും ഗ്രനേഡ് എറിയാനുള്ള പരിശീലനത്തിലായിരുന്നു. പത്ത് സൈനികർ ശത്രുവിനെതിരായ ആക്രമണത്തിന്റെ മാതൃകാപരിശീലനത്തിലും പങ്കെടുത്തിരുന്നു.
സമാധാനകാലത്ത് കനേഡിയൻ സായുധസേനയുടെ രാജ്യത്തിനകത്തുണ്ടായ ഏറ്റവും വലിയ ദുരന്തങ്ങളിലൊന്നാണിതെന്ന് പ്രധാനമന്ത്രി മാർക്ക് കാർണി പ്രതികരിച്ചു. രാജ്യത്തിന്റെ വിവിധ പ്രവിശ്യകളിൽനിന്നുള്ള സൈനികരും റിസർവ് സേനാംഗങ്ങളും ദുരന്തത്തിൽ ബാധിക്കപ്പെട്ടിട്ടുണ്ടെന്ന് പ്രതിരോധ മന്ത്രി വ്യക്തമാക്കി.
രക്തദാനം നടത്താൻ ആഗ്രഹിക്കുന്നവർ ഇനിയും മുന്നോട്ടുവരണമെന്ന് കനേഡിയൻ ബ്ലഡ് സർവീസസ് അഭ്യർഥിച്ചു. രോഗികളുടെയും ആശുപത്രികളുടെയും ആവശ്യങ്ങൾ നിരീക്ഷിച്ചുവരികയാണെന്നും ആവശ്യമായ രക്തലഭ്യത ഉറപ്പാക്കാൻ ആരോഗ്യസംവിധാനങ്ങളുമായി സഹകരിക്കുമെന്നും സംഘടന അറിയിച്ചു.
ദുരന്തത്തിൽ മരിച്ചവരോടുള്ള ആദരസൂചകമായി ഫെഡറൽ, പ്രവിശ്യാ സർക്കാർ കെട്ടിടങ്ങളിലെ പതാകകൾ പകുതി താഴ്ത്തിക്കെട്ടി. പരുക്കേറ്റ എല്ലാ സൈനികരും പൂർണമായി സുഖം പ്രാപിക്കുമെന്ന പ്രതീക്ഷയും പ്രീമിയർ ഡാനിയേൽ സ്മിത്ത് പങ്കുവെച്ചു.
