യെല്ലോനൈഫ്: നോര്ത്ത് വെസ്റ്റ് ടെറിട്ടറീസിലെ രണ്ട് സ്കൂളുകളിലെ കുടിവെള്ളത്തില് അനുവദനീയമായതിലും കൂടുതല് ലെഡിന്റെ അളവ് കണ്ടെത്തിയതിനെത്തുടര്ന്ന് അധികൃതര് വാട്ടര് ഫിക്ചറുകള് അടച്ചുപൂട്ടി. ഫോര്ട്ട് ലിയാര്ഡിലെ എക്കോ ഡെന് സ്കൂള് (Echo Dene School), സാക്സ് ഹാര്ബറിലെ ഇനുവല്ത്തുയാക് സ്കൂള് (Inualthuyak School) എന്നിവിടങ്ങളിലാണ് ഹെല്ത്ത് കാനഡയുടെ മാനദണ്ഡങ്ങള് ലംഘിക്കുന്ന രീതിയില് ഈയത്തിന്റെ സാന്നിധ്യം കണ്ടെത്തിയത്.
ഹെല്ത്ത് കാനഡയുടെ മാര്ഗ്ഗനിര്ദ്ദേശമനുസരിച്ച്, കുടിവെള്ളത്തില് ഈയത്തിന്റെ അളവ് ലിറ്ററിന് 5 മൈക്രോ ഗ്രാമില് കൂടാന് പാടില്ല. പരിശോധനാ ഫലം പുറത്തുവന്നതിന് പിന്നാലെ ചീഫ് പബ്ലിക് ഹെല്ത്ത് ഓഫീസര് അടിയന്തര നടപടിക്ക് ഉത്തരവിട്ടു. ബാധിക്കപ്പെട്ട വാട്ടര് ഫൗണ്ടനുകളും മറ്റ് പൈപ്പുകളും പ്രവര്ത്തനരഹിതമാക്കുകയും പകരം കുടിവെള്ള സൗകര്യങ്ങള് ഏര്പ്പെടുത്തുകയും ചെയ്തിട്ടുണ്ട്. ഫില്ട്ടറുകള് സ്ഥാപിക്കുന്നതും പൈപ്പുകള് മാറ്റുന്നതും ഉള്പ്പെടെയുള്ള പരിഹാര നടപടികള് പൂര്ത്തിയാക്കി വീണ്ടും പരിശോധന നടത്തിയ ശേഷമേ ഇവ ഇനി ഉപയോഗിക്കാന് അനുവദിക്കൂ.
അതേസമയം, മേഖലയിലെ മറ്റ് മൂന്ന് സ്കൂളുകളില് (Ndശlീ, Nahanni Butte, Tuktoyaktuk) നടത്തിയ പരിശോധനകളില് കുടിവെള്ളം സുരക്ഷിതമാണെന്ന് കണ്ടെത്തി. നോര്ത്ത് വെസ്റ്റ് ടെറിട്ടറീസിലെ മുഴുവന് സ്കൂളുകളിലെയും കുടിവെള്ളത്തിന്റെ ഗുണനിലവാരം പരിശോധിക്കുന്നതിനുള്ള വിപുലമായ പദ്ധതിയുടെ ഭാഗമായാണ് ഈ നടപടികള്. കെട്ടിടത്തിന്റെ പഴക്കം, വിദ്യാര്ത്ഥികളുടെ പ്രായം എന്നിവ കണക്കിലെടുത്താണ് മുന്ഗണനാക്രമത്തില് പരിശോധന നടത്തുന്നത്. ഇതിനായുള്ള ചെലവുകള് സര്ക്കാര് വഹിക്കുമെന്നും ബജറ്റ് പ്രതിസന്ധി ഭയന്ന് നടപടികള് വൈകിക്കരുതെന്നും അധികൃതര് നിര്ദ്ദേശിച്ചു.
സാന്ഡ് വിച്ച്
