തൃശൂര്: തൃശൂരില് തിരുവമ്പാടി ദേവസ്വത്തിന്റെ വെടിക്കോപ്പ് നിര്മ്മാണത്തിനിടെ സ്ഫോടനം നടന്ന് നിരവധി പേര് കൊല്ലപ്പെട്ട സാഹചര്യത്തില് തൃശൂര് പൂരം ചടങ്ങുകള് മാത്രമാക്കാന് ആലോചന. അന്തിമ തീരുമാനം ഇന്ന് ചേരുന്ന മന്ത്രിസഭായോഗത്തില് കൈക്കൊള്ളും. മന്ത്രിസഭാ യോഗത്തിന് ശേഷം നാളെ തിരുവമ്പാടി പാറമേക്കാവ് ദേവസ്വങ്ങളുടേയും ഘടക ക്ഷേത്രങ്ങളുടെയും യോഗം വിളിക്കും.
ഇന്ന് രാവിലെ 10 മണിക്ക് മുഖ്യമന്ത്രിയുടെ അധ്യക്ഷതയില് ചേരുന്ന പ്രത്യേക ഓണ്ലൈന് മന്ത്രിസഭാ യോഗത്തില് ഇതുസംബന്ധിച്ച അന്തിമ തീരുമാനമുണ്ടാകും. സ്ഫോടനത്തില് നിരവധി പേര് കൊല്ലപ്പെടുകയും ഒട്ടേറെ പേര്ക്ക് ഗുരുതരമായി പരിക്കേല്ക്കുകയും ചെയ്ത സാഹചര്യത്തില് വന്തോതിലുള്ള ആഘോഷങ്ങള് ഒഴിവാക്കാനാണ് പ്രാഥമിക ധാരണ.
മരിച്ചവരുടെ കുടുംബങ്ങള്ക്കും പരിക്കേറ്റവര്ക്കുമുള്ള ധനസഹായം, അപകടത്തെക്കുറിച്ചുള്ള സമഗ്രമായ അന്വേഷണം എന്നിവയും മന്ത്രിസഭാ യോഗം ചര്ച്ച ചെയ്യും. സര്ക്കാര് തീരുമാനത്തോട് പൂര്ണ്ണമായി സഹകരിക്കുമെന്ന് തിരുവമ്പാടി, പാറമേക്കാവ് ദേവസ്വങ്ങള് വ്യക്തമാക്കിയിട്ടുണ്ട്. ആചാരങ്ങള് പാലിച്ചുകൊണ്ടുള്ള ചടങ്ങുകള് മാത്രം മതിയെന്ന് സര്ക്കാര് നിര്ദ്ദേശിച്ചാല് അത് അംഗീകരിക്കുമെന്നും ജനങ്ങളുടെ വികാരവും സുരക്ഷയും കണക്കിലെടുത്ത് ഉചിതമായ നിലപാട് സ്വീകരിക്കുമെന്നും ദേവസ്വം ഭാരവാഹികള് അറിയിച്ചു.
പൂരം നടത്തിപ്പുമായി ബന്ധപ്പെട്ട് സര്ക്കാര് എന്ത് തീരുമാനമെടുത്താലും അംഗീകരിച്ചു മുന്നോട്ട് പോകുമെന്ന് തിരുവമ്പാടി ദേവസ്വം സെക്രട്ടറി ഗിരീഷ് കുമാര് പറഞ്ഞു. ദേശത്തെ ആളുകളുമായി ചര്ച്ച നടത്തും. മറ്റുകാര്യങ്ങള് ഒന്നും ചര്ച്ച ചെയ്യാന് സമയം കിട്ടിയിട്ടില്ല. തിരുവമ്പാടി ദേവസ്വത്തിലെ ആഘോഷ കമ്മിറ്റിയില്പെട്ടവരും അപകട സമയത്ത് അവിടെ ഉണ്ടായിരുന്നു. ഒരാളുടെ മരണം സ്ഥിരീകരിച്ചുവെന്നും ഗിരീഷ് കുമാര് പറഞ്ഞു.
