ചെന്നൈ: തമിഴ്നാട്ടില് ഡിഎംകെ സഖ്യം വിട്ട് മുസ്ലിം ലീഗ്. ടിവികെ സര്ക്കാരിന്റെ ഭാഗമായതിന് പിന്നാലെയാണ് ലീഗ് തീരുമാനം. ചെന്നൈയില് നടന്ന ലീഗ് ജനറല് കൗണ്സിലിലാണ് ഇതു സംബന്ധിച്ച തീരുമാനമെടുത്തത്. ടിവികെ മന്ത്രിസഭയില് അംഗമായിരിക്കുമ്പോള് ഡിഎംകെ സഖ്യത്തില് തുടരുന്നത് ഉചിതമല്ലെന്നാണ് പാര്ട്ടിയുടെ നിലപാട്. കോണ്ഗ്രസ്, വിസികെ (VCK) എന്നീ പാര്ട്ടികള് നേരത്തെ തന്നെ ഡിഎംകെ സഖ്യം വിട്ടിരുന്ന സാഹചര്യത്തിലാണ് മുസ്ലിം ലീഗും ഇപ്പോള് ഔദ്യോഗികമായി ഈ മുന്നണി മാറ്റം പ്രഖ്യാപിച്ചിരിക്കുന്നത്. ഇന്ന് ചെന്നൈയില് ചേര്ന്ന ജനറല് കൗണ്സില് യോഗത്തില് ഇതുള്പ്പെടെ 14 പ്രധാന പ്രമേയങ്ങളാണ് പാര്ട്ടി പാസാക്കിയത്.
തമിഴ്നാട് നിയമസഭാ തിരഞ്ഞെടുപ്പില് ഡിഎംകെ സഖ്യത്തില് മത്സരിച്ച മുസ്ലിം ലീഗ് രണ്ട് സീറ്റുകളില് വിജയം നേടിയിരുന്നു. പാപനാശം, വാണിയമ്പാടി എന്നീ മണ്ഡലങ്ങളില് നിന്നാണ് പാര്ട്ടി പ്രതിനിധികള് നിയമസഭയിലേക്ക് തിരഞ്ഞെടുക്കപ്പെട്ടത്. തിരഞ്ഞെടുപ്പിന് ശേഷം തമിഴ്നാട്ടില് രൂപീകൃതമായ രാഷ്ട്രീയ സാഹചര്യത്തില്, പാപനാശം എംഎല്എയായ എ.എം. ഷാജഹാനെ മുഖ്യമന്ത്രി സി. ജോസഫ് വിജയ് നയിക്കുന്ന ടിവികെ സര്ക്കാരിന്റെ മന്ത്രിസഭയില് ഉള്പ്പെടുത്തിയിരുന്നു. നിലവില് അദ്ദേഹം ന്യൂനപക്ഷ ക്ഷേമ വകുപ്പ് മന്ത്രിയായി സേവനമനുഷ്ഠിച്ചു വരികയാണ്. ഈ ഭരണ പങ്കാളിത്തത്തിന്റെ തുടര്ച്ചയായാണ് രാഷ്ട്രീയ സഖ്യത്തിലും മാറ്റം വരുത്താന് പാര്ട്ടി തീരുമാനിച്ചത്.
ദീര്ഘകാലത്തെ രാഷ്ട്രീയ ചരിത്രമുള്ള ഡിഎംകെ-മുസ്ലിം ലീഗ് ബന്ധത്തിനാണ് ഈ തീരുമാനത്തോടെ വിരാമമാകുന്നത്. 1962-ലാണ് ഐയുഎംഎല് ആദ്യമായി ഡിഎംകെയുമായി സഖ്യം സ്ഥാപിക്കുന്നത്. ദശാബ്ദങ്ങള് നീണ്ട ഈ ബന്ധം അവസാനിപ്പിച്ചാണ് പാര്ട്ടി ഇപ്പോള് ടിവികെ പാളയത്തിലേക്ക് എത്തിയിരിക്കുന്നത്. അതേസമയം, വരാനിരിക്കുന്ന തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിലെ സഖ്യം സംബന്ധിച്ച അന്തിമ തീരുമാനം പിന്നീട് മാത്രമേ കൈക്കൊള്ളുകയുള്ളൂ എന്നും പാര്ട്ടി നേതൃത്വം ജനറല് കൗണ്സില് യോഗത്തിന് ശേഷം വ്യക്തമാക്കിയിട്ടുണ്ട്.
