ബ്രിട്ടിഷ് കൊളംബിയ: ബ്രിട്ടിഷ് കൊളംബിയയിലെ വെസ്റ്റ് കെലോണയില് കഴിഞ്ഞ ദിവസമുണ്ടായ കാട്ടുതീയ്ക്ക് കാരണം പ്രാദേശിക പാര്ക്കിനുള്ളില് നിയമവിരുദ്ധമായി കൂട്ടിയ ക്യാമ്പ് ഫയര് ആണെന്ന് അധികൃതര് കണ്ടെത്തി. ചൊവ്വാഴ്ച രാവിലെ പതിനൊന്ന് മണിയോടെ കലാമോയര് റീജിയണല് പാര്ക്കിലാണ് (Kalamoir Regional Park) തീപിടിത്തമുണ്ടായത്. ശക്തമായ കാറ്റിനെത്തുടര്ന്ന് തീ പടര്ന്നതോടെ നൂറുകണക്കിന് വീടുകളില് നിന്നുള്ള ജനങ്ങളെ അടിയന്തിരമായി ഒഴിപ്പിക്കേണ്ടി വന്നിരുന്നു.
പ്രാദേശിക നിയമപ്രകാരം പാര്ക്കുകള്ക്കുള്ളില് ഇത്തരം ക്യാമ്പ് ഫയറുകള് കൂട്ടുന്നത് കര്ശനമായി നിരോധിച്ചിട്ടുള്ളതാണ്. ഈ അപകടം മനഃപൂര്വം ഉണ്ടാക്കിയതല്ലെങ്കിലും, ഇതിന് പിന്നില് പ്രവര്ത്തിച്ചവരെ കണ്ടെത്താന് പോലീസ് അന്വേഷണം ആരംഭിച്ചതായി വെസ്റ്റ് കെലോണ ഫയര് ചീഫ് ജേസണ് ബ്രോലണ്ട് അറിയിച്ചു. ‘നമ്മുടെ പാര്ക്കുകളില് ക്യാമ്പ് ഫയറുകള്ക്ക് ഒരിക്കലും അനുമതിയില്ല,’ അനുകൂലമായ കാലാവസ്ഥയില് ഒരു ചെറിയ തീപ്പൊരി പോലും എത്രത്തോളം സ്ഫോടനാത്മകമായി പടരുമെന്നും വിനാശകരമായ പ്രത്യാഘാതങ്ങള് ഉണ്ടാക്കുമെന്നും ഈ സംഭവം തെളിയിക്കുന്നതായി അദ്ദേഹം കൂട്ടിച്ചേര്ത്തു.
പ്രാദേശിക ബൈലോ പ്രകാരം പാര്ക്കുകളില് തീ കൂട്ടുന്നവര്ക്ക് പരമാവധി 1,000 ഡോളര് വരെ പിഴ ചുമത്താന് വ്യവസ്ഥയുണ്ട്. നിലവില് വെസ്റ്റ് കെലോണയിലെ സ്വകാര്യ വ്യക്തികളുടെ പുരയിടങ്ങളില് ക്യാമ്പ് ഫയറുകള്ക്ക് നിരോധനം ഏര്പ്പെടുത്തിയിട്ടില്ലെങ്കിലും, ബി.സി വൈല്ഡ് ഫയര് സര്വീസുമായി ആലോചിച്ച് ദിവസേനയുള്ള കാലാവസ്ഥാ സാഹചര്യം വിലയിരുത്തുന്നുണ്ടെന്ന് അധികൃതര് അറിയിച്ചു. പ്രവിശ്യയിലുടനീളം വലിയ രീതിയിലുള്ള തീപിടിത്തങ്ങള്ക്ക് നിലവില് നിരോധനമുണ്ടെങ്കിലും റീജന് തലത്തില് ക്യാമ്പ് ഫയറുകള്ക്ക് മറ്റ് വിലക്കുകളില്ല.
നിലവില് കാലാമോയര് പാര്ക്കിലെ തീപിടിത്തം പൂര്ണ്ണമായും നിയന്ത്രണവിധേയമാണെന്ന് ബി.സി വൈല്ഡ് ഫയര് സര്വീസ് സ്ഥിരീകരിച്ചിട്ടുണ്ട്. ഇതേത്തുടര്ന്ന് പ്രഖ്യാപിച്ചിരുന്ന പ്രാദേശിക അടിയന്തരാവസ്ഥ സെന്ട്രല് ഒകനഗന് എമര്ജന്സി മാനേജ്മെന്റ് പിന്വലിച്ചു. എങ്കിലും മുന്കരുതലിന്റെ ഭാഗമായി പാര്ക്ക് താല്ക്കാലികമായി അടച്ചിട്ടിരിക്കുകയാണ്.
