ലാറ്റിനമേരിക്കയുടെ ആധുനിക ചരിത്രത്തിലെ ഏറ്റവും വലിയ ഇരട്ട ഭൂചലനങ്ങളിലൊന്നിൽ നടുങ്ങി വെനസ്വേല. തലസ്ഥാനമായ കരാക്കസിൽ നിന്ന് 160 കിലോമീറ്റർ പടിഞ്ഞാറ് മാറി ബുധനാഴ്ചയാണ് റിക്ടർ സ്കെയിലിൽ 7.2, 7.5 തീവ്രത രേഖപ്പെടുത്തിയ ഭൂചലനങ്ങൾ ഉണ്ടായത്. തകർന്നുവീണ കെട്ടിടങ്ങൾക്കിടയിൽ കുടുങ്ങിക്കിടക്കുന്ന നൂറുകണക്കിന് ആളുകളെ രക്ഷിക്കാനും കാണാതായ ആയിരങ്ങളെ കണ്ടെത്താനുമായി രാപകൽ ഭേദമില്ലാതെ രാജ്യത്ത് തിരച്ചിൽ തുടരുകയാണ്.
സർക്കാർ വിവരങ്ങൾ പ്രകാരം ഇതുവരെ 235 മൃതദേഹങ്ങളാണ് മെഡിക്കൽ സെന്ററുകളിൽ എത്തിച്ചത്. എന്നാൽ ഔദ്യോഗികമായി ആകെ മരണസംഖ്യ സർക്കാർ പുറത്തുവിട്ടിട്ടില്ല. അതേസമയം, കാണാതായവരെ കണ്ടെത്താൻ രാജ്യത്തെ പ്രതിപക്ഷ നേതാക്കൾ ഉൾപ്പെടെ പങ്കുവെച്ച വെബ്സൈറ്റിലെ വിവരങ്ങൾ പ്രകാരം 49,600-ലേറെ പേരെയാണ് ഇനി കണ്ടെത്താനുള്ളത്. മരണസംഖ്യ 10,000 കടന്നേക്കുമെന്നാണ് യു.എസ് ജിയോളജിക്കൽ സർവേ (USGS) പ്രവചിക്കുന്നത്. തങ്ങളുടെ മൂന്ന് പൗരന്മാർ മരിച്ചതായും നാല് പേർ കെട്ടിടങ്ങൾക്കിടയിൽ കുടുങ്ങിയതായും 99 പേരെ കാണാനില്ലെന്നും സ്പാനിഷ് വിദേശകാര്യ മന്ത്രാലയം അറിയിച്ചു.
വിദേശ രാജ്യങ്ങളിൽ നിന്നുള്ള രക്ഷാപ്രവർത്തകർ എത്തുന്നതിനൊപ്പം വെനസ്വേലൻ ഫയർ ഫോഴ്സും സൈന്യവും സാധാരണക്കാരും ചേർന്നാണ് നിലവിൽ രക്ഷാപ്രവർത്തനം നടത്തുന്നത്. പലയിടത്തും വൈദ്യുതി ബന്ധം പൂർണ്ണമായി തകരാറിലായതിനാൽ ടോർച്ചിന്റെ വെളിച്ചത്തിലും വെറും കൈകൾ കൊണ്ടുമാണ് ആളുകൾ കോൺക്രീറ്റ് പാളികൾ മാറ്റുന്നത്. പ്രധാന വിമാനത്താവളം സ്ഥിതി ചെയ്യുന്ന ലാ ഗ്വേറ (La Guaira) എന്ന തീരദേശ നഗരത്തെയാണ് ഭൂചലനം ഏറ്റവും രൂക്ഷമായി ബാധിച്ചത്. “അവൻ ആ കോൺക്രീറ്റ് പാളികൾക്കടിയിലാണ്, അവനെ പുറത്തെടുക്കാൻ അവിടെ യന്ത്രങ്ങളൊന്നുമില്ല,” ലാ ഗ്വേറയിൽ തകർന്ന ഏഴ് നില കെട്ടിടത്തിൽ കുടുങ്ങിയ തന്റെ 19 വയസ്സുകാരനായ മകനെക്കുറിച്ച് യാമിലെത്ത് ജിമെനെസ് എന്ന അമ്മയുടെ വാക്കുകളാണിത്.
250 കെട്ടിടങ്ങൾ തകർന്നതായി സർക്കാർ സ്ഥിരീകരിച്ചിട്ടുണ്ട്. ഇതിൽ എട്ട് ആശുപത്രികളും വെനസ്വേലൻ റെഡ് ക്രോസ്, ഫ്രഞ്ച് എംബസി എന്നിവയുടെ കെട്ടിടങ്ങളും ഉൾപ്പെടുന്നു. സാമ്പത്തിക, രാഷ്ട്രീയ പ്രതിസന്ധികൾ മൂലം ജനങ്ങൾ ദുരിതമനുഭവിക്കുന്ന രാജ്യത്ത് ഭൂചലനം കൂടി എത്തിയതോടെ ആയിരങ്ങളാണ് ഭവനരഹിതരായത്. ദുരന്തം രാജ്യത്തെ 70 ലക്ഷത്തോളം ആളുകളെ ബാധിച്ചേക്കാമെന്ന് വ്യക്തമാക്കിയ യു.എൻ മൈഗ്രേഷൻ ബോഡി, ഇവർക്കാവശ്യമായ അടിയന്തര ഷെൽട്ടറുകളും ദുരിതാശ്വാസ സാമഗ്രികളും വിതരണം ചെയ്യുന്നുണ്ട്.
കരാക്കസ്-ലാ ഗ്വേറ ഹൈവേയിലൂടെ നിരവധി സന്നദ്ധപ്രവർത്തകർ വെള്ളവും ഭക്ഷണവും മരുന്നുകളുമായി ദുരന്തബാധിത പ്രദേശങ്ങളിലേക്ക് നീങ്ങുകയാണ്. ഭൂചലനത്തിന്റെ പ്രഭവകേന്ദ്രത്തിന് സമീപമുള്ള തീരദേശ പട്ടണമായ മോറോണിലും (Moron) വ്യാപക നാശനഷ്ടങ്ങളുണ്ടായി. വീടും ബിസിനസ്സും നഷ്ടപ്പെട്ട് തെരുവിൽ അന്തിയുറങ്ങുകയാണെന്നും സഹായം വേഗത്തിൽ എത്തുമെന്ന് പ്രതീക്ഷിക്കുന്നതായും 64-കാരനായ പെഡ്രോ പെരെസ് പറഞ്ഞു. സംഭവത്തിൽ അമേരിക്കൻ പ്രസിഡന്റ് ഡൊണാൾഡ് ട്രംപ് വെനസ്വേലയ്ക്ക് സഹായം വാഗ്ദാനം ചെയ്തിട്ടുണ്ട്. വാഷിംഗ്ടൺ രക്ഷാപ്രവർത്തകരെ അയക്കുമെന്നും തകർന്ന വിമാനത്താവളത്തിന്റെ പ്രവർത്തനങ്ങൾക്കും ലോജിസ്റ്റിക്സിനും പെന്റഗൺ സഹായിക്കുമെന്നും യു.എസ് സ്റ്റേറ്റ് സെക്രട്ടറി മാർക്കോ റൂബിയോ അറിയിച്ചു
