ഓട്ടവ: പലസ്തീനിലെ മാനുഷിക പ്രതിസന്ധിയെ തുടർന്ന് ദുരിതമനുഭവിക്കുന്നവർക്ക് ആശ്വാസമാകുന്ന പ്രത്യേക ഇമിഗ്രേഷൻ നടപടികളുടെ കാലാവധി കാനഡ സർക്കാർ ഈമാസം 31 വരെ നീട്ടി. നിലവിൽ കാനഡയിൽ നിയമപരമായ താത്കാലിക സ്റ്റാറ്റസോടെ കഴിയുന്ന യോഗ്യരായ പലസ്തീൻ പൗരന്മാർക്കും അവരുടെ കുടുംബാംഗങ്ങൾക്കും ഈ തീരുമാനം ഗുണകരമാകും.
പലസ്തീൻ പാസ്പോർട്ട് കൈവശമുള്ളതും കാനഡയിൽ സാധുവായ താത്കാലിക സ്റ്റാറ്റസുള്ളതുമായ വ്യക്തികൾക്കാണ് പദ്ധതിയുടെ ആനുകൂല്യം ലഭിക്കുക. കൂടാതെ, കനേഡിയൻ പൗരന്മാരുടെയോ സ്ഥിരതാമസക്കാരുടെയോ ചില യോഗ്യരായ കുടുംബാംഗങ്ങൾക്കും പ്രത്യേക ഇളവുകൾ ബാധകമാണെന്ന് അധികൃതർ അറിയിച്ചു.
പലസ്തീൻ പ്രദേശങ്ങളിലെ മാനുഷിക പ്രതിസന്ധി പരിഗണിച്ചാണ് ഈ പ്രത്യേക നടപടികൾ നടപ്പിലാക്കുന്നതെന്ന് കാനഡ സർക്കാർ വ്യക്തമാക്കി. അർഹരായ അപേക്ഷകർക്ക് അപേക്ഷകൾ വേഗത്തിലും കാര്യക്ഷമമായും പരിഗണിക്കുന്നതിനായി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) ഉദ്യോഗസ്ഥർക്ക് പ്രത്യേക ഓപ്പറേഷണൽ പബ്ലിക് പോളിസി നിർദ്ദേശങ്ങളും നൽകിയിട്ടുണ്ട്.
നിലവിലുള്ള മാനുഷിക സഹായ പദ്ധതികൾക്ക് പകരമായല്ല, അവയ്ക്ക് അനുബന്ധമായാണ് ഈ പുതിയ ഇമിഗ്രേഷൻ ഇളവുകൾ നടപ്പാക്കുന്നതെന്ന് അധികൃതർ വ്യക്തമാക്കി. പുതുക്കിയ കാലാവധിയും വ്യവസ്ഥകളും ഉൾപ്പെടുത്തി മുൻ മാർഗനിർദേശങ്ങൾ കൂടുതൽ ശക്തിപ്പെടുത്തുന്നതാണ് പുതിയ തീരുമാനമെന്നും സർക്കാർ അറിയിച്ചു.
