ഗാംഗ്ടോക്: സിക്കിമിലെ നാംചിയില് നിര്മാണത്തിലിരുന്ന തുരങ്കം തകര്ന്നുണ്ടായ ദുരന്തത്തില് കാണാതായ മലയാളി ജീവനക്കാരന് മരിച്ചതായി സ്ഥിരീകരണം. കോട്ടയം സ്വദേശിയായ അനീഷിന്റെ മൃതദേഹം രക്ഷാപ്രവര്ത്തകര് തിരിച്ചെടുത്തു. വിവരം അധികൃതര് മുംബൈയിലെ നോര്ക്ക (NORKA) ഓഫീസിനെ അറിയിച്ചിട്ടുണ്ട്. അര്ദ്ധരാത്രിയോടെയാണ് മൃതദേഹം കണ്ടെടുത്തത്. മൃതദേഹം എത്രയും വേഗം നാട്ടിലെത്തിക്കാനുള്ള നടപടികള് ആരംഭിച്ചതായി ചാണ്ടി ഉമ്മന് എം.എല്.എ അറിയിച്ചു. സംഭവസ്ഥലത്ത് അനീഷിന്റെ ബന്ധുക്കള് എത്തിച്ചേര്ന്നിട്ടുണ്ട്. 2011 മുതല് നാഷണല് ഹൈഡ്രോ ഇലക്ട്രിക് പവര് കോര്പ്പറേഷനില് (NHPC) ഉദ്യോഗസ്ഥനായി സേവനമനുഷ്ഠിച്ചു വരികയായിരുന്നു അനീഷ്.
തിങ്കളാഴ്ച സിക്കിമിലെ നാംചി ജില്ലയില് തീസ്ത ആറാം ഘട്ട ജലവൈദ്യുത പദ്ധതിയുടെ ഭാഗമായി നിര്മിച്ചിരുന്ന തുരങ്കത്തിലാണ് വന് അപകടമുണ്ടായത്. തുരങ്കത്തിനുള്ളില് വച്ച് മീഥേന് വാതകം ചോര്ന്നുണ്ടായ സ്ഫോടനത്തെ തുടര്ന്ന് മണ്ണിടിച്ചില് ഉണ്ടാകുകയായിരുന്നു. അപകടസമയത്ത് NHPC ഉദ്യോഗസ്ഥരടക്കം 25 പേരാണ് തുരങ്കത്തിനുള്ളില് കുടുങ്ങിയത്.
ഇതോടെ ദുരന്തത്തില് മരിച്ചവരുടെ എണ്ണം 22 ആയി സ്ഥിരീകരിച്ചു. ഇന്നലെ മാത്രം ഒമ്പത് പേരുടെ മൃതദേഹങ്ങളാണ് രക്ഷാപ്രവര്ത്തകര് തുരങ്കത്തില് നിന്നും പുറത്തെടുത്തത്. എന്.ഡി.ആര്.എഫ് (NDRF), എസ്.ഡി.ആര്.എഫ് (SDRF), ഫയര്ഫോഴ്സ് എന്നിവര്ക്ക് പുറമെ ഡയറക്ടറേറ്റ് ജനറല് ഓഫ് മൈന്സ് സേഫ്റ്റിയില് നിന്നുള്ള വിദഗ്ധ സംഘവും അപകടസ്ഥലത്ത് സജീവമായി തിരച്ചില് നടത്തുന്നുണ്ട്. ബാക്കിയുള്ളവര്ക്കായി തിരച്ചില് ഇപ്പോഴും ഊര്ജിതമായി പുരോഗമിക്കുകയാണ്.
