വാഷിങ്ടണ്: ഇറാനും അമേരിക്കയും തമ്മില് രൂപീകരിക്കുന്ന സമാധാന കരാറില് കടുത്ത അതൃപ്തി രേഖപ്പെടുത്തി ഇസ്രയേല്. കരാറിന്റെ പൂര്ണ്ണമായ വിവരങ്ങള് തങ്ങള്ക്ക് കൈമാറണമെന്ന ഇസ്രയേലിന്റെ ഔദ്യോഗിക അഭ്യര്ഥന അമേരിക്കന് ഭരണകൂടം തള്ളിയതായാണ് അന്താരാഷ്ട്ര മാധ്യമങ്ങള് റിപ്പോര്ട്ട് ചെയ്യുന്നത്. ജി-സെവന് (G7) ഉച്ചകോടിയ്ക്കിടെ മാധ്യമങ്ങളോട് സംസാരിക്കവെ, അമേരിക്കന് പ്രസിഡന്റ് ഡോണള്ഡ് ട്രംപ് ഇസ്രയേല് പ്രധാനമന്ത്രി ബെഞ്ചമിന് നെതന്യാഹുവിനെതിരെ പരസ്യമായി രംഗത്തെത്തി. ലെബനന് വിഷയത്തില് നെതന്യാഹു കൂടുതല് ഉത്തരവാദിത്തത്തോടെ പെരുമാറണമെന്നും ഇസ്രയേലിന്റെ നിലവിലെ നടപടികളില് താന് അസന്തുഷ്ടനാണെന്നും ട്രംപ് വ്യക്തമാക്കി.
ഹിസ്ബുല്ലയ്ക്കെതിരായ സൈനിക നടപടികള് ഇസ്രയേല് ഉടന് അവസാനിപ്പിച്ചില്ലെങ്കില് കനത്ത പ്രത്യാഘാതം നേരിടേണ്ടിവരുമെന്ന് ഇറാന് സൈന്യവും മുന്നറിയിപ്പ് നല്കിയിട്ടുണ്ട്. ലെബനനില് നിന്നും ഇസ്രയേല് സൈന്യത്തെ പൂര്ണ്ണമായി പിന്വലിക്കാനുള്ള നിര്ദേശങ്ങള് അമേരിക്കയുമായുള്ള കരാറിലുണ്ടെന്നാണ് നയതന്ത്ര ഉദ്യോഗസ്ഥരെ ഉദ്ധരിച്ചുള്ള റിപ്പോര്ട്ടുകള് സൂചിപ്പിക്കുന്നത്. എന്നാല് ഈ കരാര് ഇറാനും അമേരിക്കയും തമ്മില് മാത്രമുള്ളതായതിനാല് ഇസ്രയേല് ഇതില് നേരിട്ട് ഒരു കക്ഷിയല്ല. നിലവിലെ യുദ്ധത്തില് ഇസ്രയേല് സൈന്യം കൈവശപ്പെടുത്തിയ ലെബനന് അടക്കമുള്ള പ്രദേശങ്ങളില് നിന്ന് അവരെ പിന്വലിക്കാതെ, മേഖലയില് യുദ്ധം പൂര്ണ്ണമായും അവസാനിക്കില്ലെന്ന് ഇറാന് വിദേശകാര്യമന്ത്രി അബ്ബാസ് അരഗ്ചിയും ഇതേപ്പറ്റി വ്യക്തമാക്കിയിട്ടുണ്ട്.
അതേസമയം, യുദ്ധക്കെടുതിയിലായ ഇറാനില് വന്കിട സ്വകാര്യ നിക്ഷേപങ്ങള് പ്രോത്സാഹിപ്പിക്കുന്നതിനായി 300 ബില്യണ് ഡോളറിന്റെ ബൃഹത്തായ ഒരു സ്വകാര്യ ഫണ്ട് രൂപീകരിക്കാന് ഈ കരാറില് വ്യവസ്ഥയുള്ളതായി റിപ്പോര്ട്ടുകളുണ്ട്. ഗള്ഫ് രാജ്യങ്ങള്, ഏഷ്യ, സൗത്ത് അമേരിക്ക എന്നിവിടങ്ങളില് നിന്നുള്ള സ്വകാര്യ കമ്പനികളുടെ പങ്കാളിത്തത്തോടെയുള്ള ഈ ഫണ്ടിലേക്ക് ആവശ്യമായ തുകയുടെ പകുതിയിലധികവും ഇതിനകം തന്നെ ഉറപ്പാക്കിക്കഴിഞ്ഞതായി പ്രമുഖ വാര്ത്താ ഏജന്സിയായ റോയിട്ടേഴ്സ് റിപ്പോര്ട്ട് ചെയ്യുന്നു. ഇറാന് തങ്ങളുടെ ആണവ പദ്ധതികള് പൂര്ണ്ണമായും ഉപേക്ഷിക്കുന്ന മുറയ്ക്ക് മാത്രമേ ഈ സാമ്പത്തിക പാക്കേജ് നടപ്പിലാക്കൂ എന്ന് അമേരിക്കന് വൃത്തങ്ങള് സൂചന നല്കുന്നു.
