പാലക്കാട്: പാലക്കാട് ജില്ലയില് ഡെങ്കിപ്പനി ബാധിച്ച് വീണ്ടും മരണം സ്ഥിരീകരിച്ചു. കരിമ്പുഴ ആറ്റാശ്ശേരി വള്ളിക്കാട്ടില് ജിജോ മോഹന് (42) ആണ് രോഗബാധയെത്തുടര്ന്ന് അന്തരിച്ചത്. പെരിന്തല്മണ്ണയിലെ സ്വകാര്യ ആശുപത്രിയില് ചികിത്സയിലിരിക്കെയായിരുന്നു മരണം. ഇതോടെ ജില്ലയില് ഒരാഴ്ചയ്ക്കിടെ ഡെങ്കിപ്പനി മൂലമുണ്ടാകുന്ന മരണങ്ങളുടെ എണ്ണം മൂന്നായി ഉയര്ന്നു. ഈ വര്ഷം ഇതുവരെ പാലക്കാട് ജില്ലയില് മാത്രം അഞ്ചുപേരാണ് ഡെങ്കിപ്പനി ബാധിച്ച് മരണപ്പെട്ടത്.
ജില്ലയില് ഡെങ്കിപ്പനി വ്യാപനം അതീവ ഗുരുതരമായി തുടരുകയാണ്. കഴിഞ്ഞ ദിവസങ്ങളില് കരിമ്പുഴ സ്വദേശിയായ 62 കാരിയും, ജൂണ് 13-ന് പട്ടാമ്പി സ്വദേശിനിയായ 73 കാരിയും രോഗം ബാധിച്ച് മരണപ്പെട്ടിരുന്നു. കഴിഞ്ഞ മാസവും രണ്ടുപേര് ഡെങ്കിപ്പനി ബാധിച്ച് മരിച്ചിരുന്നു. ഈ മാസം മാത്രം ജില്ലയില് 543 പേരാണ് രോഗബാധയെത്തുടര്ന്ന് ചികിത്സ തേടിയത്. ഇതില് ഏറ്റവും കൂടുതല് കേസുകള് റിപ്പോര്ട്ട് ചെയ്തിരിക്കുന്നത് മണ്ണാര്ക്കാട് മേഖലയിലാണ്. രോഗവ്യാപനം തടയുന്നതിനായി ജില്ലാ ആരോഗ്യവകുപ്പ് പ്രതിരോധ പ്രവര്ത്തനങ്ങള് ഊര്ജിതമാക്കിയിട്ടുണ്ട്.
ഡെങ്കിപ്പനിയോടൊപ്പം സംസ്ഥാനത്ത് ഷിഗെല്ല രോഗബാധയും ആശങ്ക ഉയര്ത്തുന്നുണ്ട്. കഴിഞ്ഞദിവസം കൊല്ലം, ഇടുക്കി, കോഴിക്കോട്, വയനാട്, കണ്ണൂര് എന്നീ ജില്ലകളിലായി 8 പേര്ക്ക് കൂടി ഷിഗെല്ല സ്ഥിരീകരിച്ചു. ഇതോടെ ഈ മാസം മാത്രം രോഗം ബാധിച്ചവരുടെ എണ്ണം 79 ആയി ഉയര്ന്നു. നാല് പേരാണ് ഈ മാസം ഷിഗെല്ല ബാധിച്ച് മരണപ്പെട്ടത്. ഈ വര്ഷം ഇതുവരെ സംസ്ഥാനത്താകെ 155 പേര്ക്കാണ് ഷിഗെല്ല രോഗബാധ സ്ഥിരീകരിച്ചിട്ടുള്ളത്.
