മണ്ട്രിയോള്: കാനഡയിലെ പിടിക്കിട്ടാപ്പുളളി ആള് ബോയിവിന് സ്പെയിനില് പിടിയില്. മൂന്ന് വര്ഷത്തിലേറെയായി ഒളിവിലായിരുന്ന ഇയാള് സ്പെയിനിലെ മാര്ബെല്ലയില് വെച്ചാണ് കസ്റ്റഡിയിലായതെന്നാണ് സൂചന. എന്നാല്, അറസ്റ്റ് ഔദ്യോഗികമായി സ്ഥിരീകരിക്കുന്നതിനായി കെബെക് പ്രവിശ്യാ പൊലീസും യൂറോപ്യന് അധികൃതരും തമ്മില് ചര്ച്ചകള് നടത്തിവരികയാണെന്ന് കെബെക് സുരേതെ (SQ) അറിയിച്ചു.
36-കാരനായ ബോയിവിനെതിരെ മയക്കുമരുന്ന് കടത്ത്, സംഘടിത കുറ്റകൃത്യങ്ങള്, ക്രൂരമായ മര്ദ്ദനം, തട്ടിക്കൊണ്ടുപോകല്, അനധികൃതമായി തടങ്കലില് വെക്കല്, ആയുധക്കടത്ത് തുടങ്ങി നിരവധി ഗുരുതരമായ കുറ്റകൃത്യങ്ങളാണ് ചുമത്തിയിരിക്കുന്നത്. 2022-ല് ക്യൂബെക്കില് നടന്ന മോട്ടോര്സൈക്കിള് ഗാംഗുകള് തമ്മിലുള്ള കുപ്രസിദ്ധമായ ചേരിതിരിഞ്ഞുള്ള ആക്രമണങ്ങളിലും ഇയാള്ക്ക് പങ്കുണ്ടെന്ന് അധികൃതര് വ്യക്തമാക്കുന്നു. കൊലപാതകം, ക്രൂരമായ പീഡനങ്ങള്, കൈകാലുകള് മുറിച്ചുമാറ്റല് തുടങ്ങിയ അതിക്രമങ്ങള് ഈ ഗാങ് യുദ്ധങ്ങളുടെ ഭാഗമായി നടന്നിരുന്നു.
2023 ഫെബ്രുവരി 15 മുതല് ഒളിവിലായിരുന്ന ബോയിവിനെ പിടികൂടാന് സഹായിക്കുന്നവര്ക്ക് ഒരു ലക്ഷം ഡോളര് വരെ പ്രതിഫലം പ്രഖ്യാപിച്ചിരുന്നു. ഇയാളെ പിടികൂടാന് സഹായിച്ച സുരേതെ ഡു ക്യൂബെക്, ആര്.സി.എം.പി, ഇന്റര്പോള് ഉദ്യോഗസ്ഥരെ ക്യൂബെക് ആഭ്യന്തര സുരക്ഷാ മന്ത്രി ഇയാന് ലാഫ്രെനിയര് അഭിനന്ദിച്ചു.
