ഡൽഹി: OCI (Overseas Citizen of India) കാർഡുടമകൾക്ക് വലിയ ആശ്വാസമായി കേന്ദ്ര സർക്കാർ e-OCI (ഇലക്ട്രോണിക് OCI കാർഡ്) സംവിധാനം ഔദ്യോഗികമായി ആരംഭിച്ചു. ഇനി മുതൽ ഫിസിക്കൽ OCI ബുക്ക്ലെറ്റ് എല്ലായിടത്തും കൊണ്ടുപോകേണ്ടതില്ലെന്നും, മൊബൈലിൽ ഡിജിറ്റൽ കാർഡ് ഉപയോഗിച്ച് തന്നെ ഇമിഗ്രേഷൻ നടപടികൾ പൂർത്തിയാക്കാമെന്നും അധികൃതർ അറിയിച്ചു.
ഇന്ത്യൻ സർക്കാരിന്റെ ബ്യൂറോ ഓഫ് ഇമിഗ്രേഷൻ (Bureau of Immigration) പുറത്തിറക്കിയ അറിയിപ്പിലാണ് പുതിയ സംവിധാനം സംബന്ധിച്ച വിശദാംശങ്ങൾ വ്യക്തമാക്കിയിരിക്കുന്നത്.
e-OCI കാർഡ് എങ്ങനെ ഡൗൺലോഡ് ചെയ്യാം
ഇതിനകം OCI കാർഡ് ലഭിച്ചിട്ടുള്ളവർക്ക് താഴെ പറയുന്ന ഘട്ടങ്ങളിലൂടെ e-OCI കാർഡ് ഡൗൺലോഡ് ചെയ്യാം:
- ആദ്യം OCI സർവീസസ് പോർട്ടലിൽ (ociservices.gov.in) ലോഗിൻ ചെയ്യുക
- രജിസ്റ്റർ ചെയ്തിട്ടില്ലെങ്കിൽ, OCI അപേക്ഷയ്ക്കായി നൽകിയ ഇമെയിൽ ഉപയോഗിച്ച് രജിസ്റ്റർ ചെയ്യുക
- ലോഗിൻ ചെയ്ത ശേഷം ഡാഷ്ബോർഡിലെ e-OCI ടാബ് തിരഞ്ഞെടുക്കുക
- അപേക്ഷാ വിവരങ്ങൾ കാണിക്കുന്ന പേജിൽ “Generate e-OCI Card” ക്ലിക്ക് ചെയ്യുക
- കാർഡ് ജനറേറ്റ് ചെയ്ത ശേഷം ഡൗൺലോഡ് ചെയ്ത് മൊബൈലിൽ സേവ് ചെയ്യുക
ഡിജിറ്റൽ e-OCI കാർഡ് ഇമിഗ്രേഷൻ ചെക്ക് പോയിന്റുകളിലും എയർലൈൻസിലും ആവശ്യമുള്ളപ്പോൾ ഉപയോഗിക്കാം.
അതേസമയം, നിലവിലുള്ള ഫിസിക്കൽ OCI കാർഡുകൾ ഉപയോഗിക്കാമെന്നും അധികൃതർ വ്യക്തമാക്കി. യാത്രക്കാരുടെ സൗകര്യവും പ്രോസസിംഗ് വേഗതയും വർധിപ്പിക്കാനാണ് പുതിയ ഡിജിറ്റൽ സംവിധാനം ലക്ഷ്യമിടുന്നതെന്ന് ബ്യൂറോ ഓഫ് ഇമിഗ്രേഷൻ അറിയിച്ചു.
വിദേശത്ത് താമസിക്കുന്ന ഇന്ത്യൻ വംശജർക്ക് യാത്രയും ഇമിഗ്രേഷൻ നടപടികളും കൂടുതൽ സുഗമമാക്കുന്നതാണ് ഈ പുതിയ നീക്കം.
