ടൊറന്റോ:കാനഡയിൽ പെട്രോൾ വില വീണ്ടും ഉയർന്നതോടെ യാത്രക്കാരും വാഹന ഉടമകളും ആശങ്കയിൽ. വാരാന്ത്യത്തിൽ നേരിയ വിലക്കുറവ് പ്രതീക്ഷിക്കുന്നുണ്ടെങ്കിലും ജൂലൈ അവസാനത്തോടെ ഇന്ധനവില വീണ്ടും ഉയരാൻ സാധ്യതയുണ്ടെന്നാണ് വിപണി വിദഗ്ധരുടെ മുന്നറിയിപ്പ്.ഒറ്റ രാത്രികൊണ്ട് ലിറ്ററിന് ഏകദേശം അഞ്ച് സെന്റ് വരെ വില വർധിച്ചതോടെ രാജ്യത്തെ ശരാശരി പെട്രോൾ വില 1.72 കാനഡ ഡോളറിലെത്തി. ഇതോടെ ദൈർഘ്യമേറിയ യാത്രകൾ ആസൂത്രണം ചെയ്തവർക്കും നിത്യയാത്ര നടത്തുന്നവർക്കും അധിക സാമ്പത്തികഭാരം നേരിടേണ്ടി വരുന്നു.
പ്രത്യേകിച്ച് ടൊറന്റോയിൽ നിന്ന് കോട്ടേജ് മേഖലകളിലേക്കും മറ്റ് വിനോദസഞ്ചാര കേന്ദ്രങ്ങളിലേക്കും വാരാന്ത്യ യാത്രകൾക്കായി പുറപ്പെട്ടവരെയാണ് വിലവർധന കൂടുതൽ ബാധിച്ചത്. യാത്രാച്ചെലവിൽ വലിയ വർധനവാണ് അനുഭവപ്പെടുന്നതെന്ന് പലരും പറയുന്നു.ഇന്ധനവില ഉയർന്നിട്ടും അതിനെ ഒഴിവാക്കാനോ നിയന്ത്രിക്കാനോ കഴിയാത്ത സാഹചര്യമാണ് വാഹന ഉടമകൾ ചൂണ്ടിക്കാട്ടുന്നത്. വരും ദിവസങ്ങളിൽ അന്താരാഷ്ട്ര എണ്ണവിലയും വിപണി സാഹചര്യങ്ങളും അനുസരിച്ചാകും ഇന്ധനവിലയിലെ തുടർ മാറ്റങ്ങൾ ഉണ്ടാകുക.
