എഡ്മിന്റന്: ആല്ബര്ട്ടയിലെ ഗ്രാമീണ മേഖലയില് പുതിയ എഐ ഡാറ്റാ സെന്റര് സ്ഥാപിക്കാന് പദ്ധതി. കാനഡയിലെ പ്രമുഖ പ്രകൃതിവാതക ഉല്പ്പാദകരായ ‘ടൂര്മാലിന് ഓയില് കോര്പ്പറേഷന്റെ’ (Tourmaline Oil Corp.) പൂര്ണ്ണ ഉടമസ്ഥതയിലുള്ള ‘എമറാള്ഡ് എനര്ജി ടെക്നോളജീസ്’ (Emerald Energy Technologies) ആണ് ആല്ബര്ട്ടയില് വന്കിട ഡാറ്റാ സെന്റര് പദ്ധതി നിര്ദ്ദേശിച്ചത്. യെല്ലോഹെഡ് കൗണ്ടിയില് എഡ്സണ് നഗരത്തിന് 40 കിലോമീറ്റര് തെക്കുപടിഞ്ഞാറായി ടൂര്മാലിന് കമ്പനിയുടെ സജീവമായ ബാന്ഷീ ഗ്യാസ് പ്ലാന്റിനോട് ചേര്ന്നുള്ള സര്ക്കാര് ഭൂമിയിലാണ് ഈ ഭീമന് ഡാറ്റാ സെന്ററും അതിനായുള്ള വൈദ്യുതി ഉല്പ്പാദന കേന്ദ്രവും സ്ഥാപിക്കാന് ഉദ്ദേശിക്കുന്നത്.
പടിഞ്ഞാറന്-മധ്യ ആല്ബര്ട്ടയില് ‘മലാക്കൈറ്റ് വണ്’ എന്ന് പേരിട്ടിരിക്കുന്ന ഈ പദ്ധതിയുടെ പ്രവര്ത്തനം ഏറ്റെടുക്കാന് നിലവില് മറ്റ് കമ്പനികളെ ഇതുവരെ പങ്കാളിയാക്കിയിട്ടില്ല. എങ്കിലും നിര്മ്മാണവുമായി മുന്നോട്ട് പോകാനാണ് ഡെവലപ്പര്മാരുടെ തീരുമാനം. ഈ വിപുലമായ പദ്ധതിയിലൂടെ പ്രതിദിനം 150 മില്യണ് ക്യൂബിക് ഫീറ്റ് പ്രകൃതിവാതകം ഉപയോഗിച്ച് 1 ഗിഗാവാട്ട് വൈദ്യുതി ഉല്പ്പാദിപ്പിക്കുകയും അതുവഴി ഡാറ്റാ സെന്റര് പ്രവര്ത്തിപ്പിക്കുകയുമാണ് ലക്ഷ്യമിടുന്നത്. വൈദ്യുതി ഉല്പ്പാദന കേന്ദ്രത്തിന് 5 ബില്യണ് ഡോളറും ഡാറ്റാ സെന്ററിന്റെ അടിസ്ഥാന സൗകര്യങ്ങള്ക്ക് 15 ബില്യണ് ഡോളറും ഉള്പ്പെടെ വന് നിക്ഷേപമാണ് ഈ പദ്ധതി പ്രതീക്ഷിക്കുന്നത്.
ഡാറ്റാ സെന്റര് പ്രവര്ത്തനസജ്ജമാകുന്നതോടെ മേഖലയില് 300 മുതല് 500 വരെ ദീര്ഘകാല ജോലികളും പവര് പ്ലാന്റില് 40 മുതല് 60 സ്ഥിരം തസ്തികകളും സൃഷ്ടിക്കപ്പെടുമെന്നാണ് വിലയിരുത്തല്. കൂടാതെ, അന്തരീക്ഷ മലിനീകരണം കുറയ്ക്കുന്നതിനായി ഉല്പ്പാദിപ്പിക്കപ്പെടുന്ന കാര്ബണ് ഡയോക്സൈഡ് വാതകം ദ്രാവക രൂപത്തിലാക്കി ഭൂമിക്കടിയില് 3,700 മീറ്റര് താഴ്ചയിലേക്ക് കടത്തിവിടുന്ന സംവിധാനവും ടൂര്മാലിന് കമ്പനി ആലോചിക്കുന്നുണ്ട്.
എമറാള്ഡ് എനര്ജി ടെക്നോളജീസ് യെല്ലോഹെഡ് കൗണ്സിലിന് മുന്നില് പദ്ധതിയുടെ വിശദാംശങ്ങള് അവതരിപ്പിച്ചതോടെ പ്രാദേശിക ഭരണകൂടം ചില ആശങ്കകള് ഉന്നയിച്ചിട്ടുണ്ട്. സമീപത്തെ എംബാരസ്, മക്ലിയോഡ് നദികളില് നിന്ന് സെക്കന്ഡില് 50 ലിറ്റര് എന്ന തോതില് ജലം ഉപയോഗിക്കുന്നത് നദികളുടെ ആവാസവ്യവസ്ഥയെ എങ്ങനെ ബാധിക്കുമെന്നതാണ് പ്രധാന ചോദ്യം. കൂടാതെ, ഈ പ്ലാന്റുകളില് ഉപയോഗിക്കുന്ന ഗ്രാഫിക്സ് പ്രോസസ്സിങ് യൂണിറ്റുകളുടെ (GPUs) ആയുസ്സ് 3 മുതല് 5 വര്ഷം മാത്രമാണെന്നിരിക്കെ, 30-50 വര്ഷത്തെ കാലാവധി കഴിഞ്ഞ് പദ്ധതി നിര്ത്തുമ്പോള് ഇത്തരം ഇലക്ട്രോണിക് അവശിഷ്ടങ്ങള് എങ്ങനെ പുനരുപയോഗിക്കുമെന്നതിനെക്കുറിച്ചും കൗണ്സില് വ്യക്തത തേടിയിട്ടുണ്ട്.
റോബ് ഹാമിലിനോട് ചേര്ന്നുള്ള ഹൈവേ 47-ന് സമീപമാണ് നിര്ദ്ദിഷ്ട പ്രദേശം കണ്ടെത്തിയിരിക്കുന്നത്. ഈ മേഖലയിലുള്ള ഫൈബര് ഒപ്റ്റിക് കേബിളുകള് വഴി കാനഡയിലെയും യുണൈറ്റഡ് സ്റ്റേറ്റ്സിലെയും ഡാറ്റാ വിനിമയം എളുപ്പമാകും. പരിസ്ഥിതി അനുമതികള്, തദ്ദേശീയ പങ്കാളികളുമായുള്ള ചര്ച്ചകള്, ആല്ബര്ട്ട യൂട്ടിലിറ്റീസ് കമ്മീഷന്റെ അംഗീകാരം, തദ്ദേശ സ്വയംഭരണ സ്ഥാപനത്തിന്റെ വികസന അനുമതി എന്നിവ ലഭിച്ചാല് മാത്രമേ പദ്ധതിയുമായി മുന്നോട്ട് പോകാന് സാധിക്കുകയുള്ളൂ. തങ്ങളുടെ ഡാറ്റാ സെന്റര് കോണ്സിയര്ജ് ടീം വഴി ഇത്തരം നൂതന പദ്ധതികളെ ആല്ബര്ട്ടയിലേക്ക് സ്വാഗതം ചെയ്യാനാണ് പ്രവിശ്യാ സര്ക്കാര് ലക്ഷ്യമിടുന്നതെന്ന് ആല്ബര്ട്ട ടെക്നോളജി ആന്ഡ് ഇന്നൊവേഷന് മന്ത്രാലയം അറിയിച്ചു.
