പി പി ചെറിയാൻ
ഹ്യൂസ്റ്റൺ : വടക്കുപടിഞ്ഞാറൻ ഹ്യൂസ്റ്റൺ ബയൂവിന് സമീപം നായയുടെ ആക്രമണത്തിൽ കൊല്ലപ്പെട്ടതായി കരുതുന്ന വയോധികയുടെ മൃതദേഹം കണ്ടെത്തി. 79 വയസ്സുള്ള സൗ എൻഗുയുടെ മൃതദേഹമാണ് കണ്ടെത്തിയത്.
സൗ എൻഗു സാധാരണയായി നടക്കാൻ പോകാറുണ്ടെന്നും ബുധനാഴ്ച ഉച്ചതിരിഞ്ഞ് നടക്കാൻ പോയിരുന്നുവെന്നും എന്നാൽ പിന്നീട് തിരിച്ചെത്തിയില്ലെന്നും കുടുംബം പറഞ്ഞു. അവർ മടങ്ങിവരാഞ്ഞപ്പോൾ മക്കൾ അന്വേഷിച്ചു. അവരുടെ അയൽപക്കത്തിനടുത്തുള്ള ഒരു ബന്ധുവാണ് അവരുടെ മൃതദേഹം കണ്ടെത്തിയത്, മൃതദേഹത്തിൽ ഒന്നിലധികം കടിയേറ്റ പാടുകൾ ഉണ്ടായിരുന്നു.
പ്രദേശത്തെ വീടുകളിൽ നിന്ന് നായ്ക്കൾ ഇടയ്ക്കിടെ രക്ഷപ്പെടുമെന്നും ഇത് സാധാരണ സംഭവമാണെന്നും അയൽവാസികൾ പറഞ്ഞു. ബുധനാഴ്ച നടക്കുമ്പോൾ നായ്ക്കളെ ശ്രദ്ധിക്കാൻ സൗ എൻഗുയോട് പറഞ്ഞിരുന്നതായി അയൽവാസി പറഞ്ഞു.
പ്രദേശത്ത് അലഞ്ഞു നടന്നിരുന്ന ഏഴ് നായ്ക്കളെ കൊന്നതായി ഹാരിസ് കൗണ്ടി പബ്ലിക് ഹെൽത്ത് പറഞ്ഞു. സൗവിന്റെ മരണം അന്വേഷണത്തിലാണെന്നും പോസ്റ്റ്മോർട്ടം നടത്തിയാൽ മരണകാരണം കണ്ടെത്തുമെന്നും അന്വേഷണ ഉദ്യോഗസ്ഥർ പറഞ്ഞു.
