ശ്രീലങ്കയിലെ നെഗോമ്പോ ജയിലിൽ രണ്ട് ദിവസമായി തുടരുന്ന തടവുകാരുടെ സംഘർഷത്തിൽ മരിച്ചവരുടെ എണ്ണം 25 ആയി. നൂറോളം പേർക്ക് പരിക്കേറ്റതായി അധികൃതർ തിങ്കളാഴ്ച അറിയിച്ചു. സമീപ വർഷങ്ങളിലെ രാജ്യത്തെ ഏറ്റവും രൂക്ഷമായ ജയിൽ കലാപങ്ങളിലൊന്നായാണ് ഈ സംഭവം വിലയിരുത്തപ്പെടുന്നത്.
കൊളംബോയിൽ നിന്ന് ഏകദേശം 35 കിലോമീറ്റർ വടക്കുള്ള തീരദേശ നഗരമായ നെഗോമ്പോയിലെ ജയിലിലാണ് ഞായറാഴ്ച സംഘർഷം ആരംഭിച്ചത്. ശിക്ഷ അനുഭവിക്കുന്ന സ്ഥിരം തടവുകാരും താൽക്കാലിക തടങ്കലിൽ കഴിയുന്നവരും തമ്മിലായിരുന്നു ഏറ്റുമുട്ടൽ. ശ്രീലങ്കൻ ജയിൽ വകുപ്പിന്റെ കണക്കുകൾ പ്രകാരം 2,400ഓളം തടവുകാരാണ് ഈ ജയിലിലുള്ളത്.
ഞായറാഴ്ച നടന്ന ആദ്യഘട്ട സംഘർഷത്തിൽ രണ്ട് തടവുകാർ കൊല്ലപ്പെടുകയും 38 പേർക്ക് പരിക്കേൽക്കുകയും ചെയ്തു. എന്നാൽ തിങ്കളാഴ്ച രാവിലെ വീണ്ടും പൊട്ടിപ്പുറപ്പെട്ട ഏറ്റുമുട്ടൽ കൂടുതൽ രൂക്ഷമായി. ഇതിൽ ആറ് ജയിൽ ഉദ്യോഗസ്ഥർ ഉൾപ്പെടെ 23 പേർ കൂടി കൊല്ലപ്പെട്ടു.
കലാപം നിയന്ത്രിക്കാൻ ലാത്തികളുമായി പൊലീസ് കലാപനിവാരണ സേനയെയും പ്രത്യേക സേനയെയും ജയിലിലേക്ക് വിന്യസിച്ചു. പരിക്കേറ്റ തടവുകാരെ പൊലീസ് ബസിൽ ആശുപത്രിയിലേക്ക് മാറ്റി. ജയിലിനുള്ളിലെ വിവിധ ഭാഗങ്ങൾ സുരക്ഷാസേന പരിശോധിച്ചുവരികയാണെന്നും അധികൃതർ അറിയിച്ചു.
സംഭവത്തെ തുടർന്ന് തടവുകാരുടെ ബന്ധുക്കൾ ഉൾപ്പെടെ നിരവധി പേർ ജയിലിന് പുറത്ത് തടിച്ചുകൂടി. ഇവരെ പൊലീസ് സുരക്ഷാവലയത്തിന് പിന്നിൽ തടഞ്ഞുനിർത്തി.
“തടവുകാർക്ക് പ്രഭാതഭക്ഷണം വിതരണം ചെയ്യുന്നതിനിടെയാണ് ഏറ്റുമുട്ടൽ തുടങ്ങിയത്. സംഘർഷം അവസാനിപ്പിക്കാൻ ജയിൽ ഉദ്യോഗസ്ഥർ ഇടപെട്ടെങ്കിലും തടവുകാർ ഉദ്യോഗസ്ഥരെ ജയിലിന്റെ കവാടം വരെ പിന്തുടരുകയും പുറത്തേക്ക് രക്ഷപ്പെടാൻ ശ്രമിക്കുകയും ചെയ്തു,” ജയിൽ വകുപ്പിന്റെ മാധ്യമപ്രവക്താവ് ചമിക ഗജനായകെ മാധ്യമങ്ങളോട് പറഞ്ഞു.
മയക്കുമരുന്ന് കടത്തുമായി ബന്ധപ്പെട്ട വിഷയമാണ് കലാപത്തിന് കാരണമെന്ന് ഗജനായകെ പറഞ്ഞു. എന്നാൽ അന്വേഷണം പുരോഗമിക്കുന്നതിനാൽ കൂടുതൽ വിവരങ്ങൾ വെളിപ്പെടുത്താനാകില്ലെന്നും അദ്ദേഹം വ്യക്തമാക്കി.
“ഏകദേശം 100 പരിക്കേറ്റവരെയാണ് ആശുപത്രിയിലെത്തിച്ചത്. വെടിയേറ്റതും മുറിവുകളും മറ്റ് പരിക്കുകളും ഉള്ളവരാണ് ഇവരിൽ പലരും,” നെഗോമ്പോ ആശുപത്രി ഡയറക്ടർ ഡോ. പുഷ്പ ഗംലത്ത് റോയിട്ടേഴ്സിനോട് പറഞ്ഞു. പരിക്കേറ്റവരിൽ 18 പേരെ മറ്റൊരു ആശുപത്രിയിലേക്കും മാറ്റിയതായും അവർ അറിയിച്ചു.
പൊലീസിന് പിന്തുണ നൽകാൻ സൈന്യത്തോട് ആവശ്യപ്പെട്ടിട്ടുണ്ടെങ്കിലും നിലവിൽ അവർ സ്റ്റാൻഡ്ബൈയിലാണ് എന്ന് സൈനിക വക്താവ് ബ്രിഗേഡിയർ വരുണ ഗമഗെ അറിയിച്ചു.
ജയിലിന്റെ സ്ഥിതിഗതികൾ നിരീക്ഷിക്കാൻ ശ്രീലങ്കൻ വ്യോമസേന ഹെലികോപ്റ്ററും നിരവധി ഡ്രോണുകളും വിന്യസിച്ചു. സന്ധ്യയോടെ കവചിത വാഹനങ്ങളടക്കം സൈനിക സാന്നിധ്യവും ജയിലിന് ചുറ്റും ശക്തമാക്കിയതായി റോയിട്ടേഴ്സ് ദൃക്സാക്ഷി റിപ്പോർട്ട് ചെയ്തു.
ജയിൽ സന്ദർശിച്ച ശേഷം നീതിന്യായ-ദേശീയ ഐക്യ മന്ത്രി ഹർഷന നാനായക്കര കൊല്ലപ്പെട്ടവരുടെ കുടുംബങ്ങളുടെ ദുഃഖത്തിൽ പങ്കുചേർന്നു.
“ചില ആയുധങ്ങൾ തടവുകാരുടെ കൈവശപ്പെട്ടതായി അറിയാം. എന്നാൽ എത്ര ആയുധങ്ങളാണ് അവരുടെ കൈയിലെത്തിയതെന്ന് ഇപ്പോൾ വ്യക്തമല്ല. ജയിൽ പൂർണമായും നിയന്ത്രണത്തിലായിട്ടുണ്ട്. അന്വേഷണം തുടരുകയാണ്. മരിച്ചവരുടെ കുടുംബങ്ങളെ അനുശോചനം അറിയിക്കുന്നു,” മന്ത്രി പറഞ്ഞു.
ശ്രീലങ്കയിൽ ഇതിനുമുമ്പും സമാന ജയിൽ കലാപങ്ങൾ റിപ്പോർട്ട് ചെയ്തിട്ടുണ്ട്. 2020 നവംബറിലെ കലാപത്തിൽ 11 തടവുകാരും 2012ൽ കൊളംബോ ജയിലിലുണ്ടായ കലാപത്തിൽ 27 പേരും കൊല്ലപ്പെട്ടിരുന്നു.
