ഓട്ടവ: രാജ്യത്തെ അർഹരായ ഭിന്നശേഷിക്കാർക്ക് ആശ്വാസമായി കാനഡ ഡിസെബിലിറ്റി ബെനഫിറ്റ് (CDB) തുക വർധിപ്പിച്ചു. 2026–27 സാമ്പത്തിക വർഷത്തിലെ ആദ്യ പേയ്മെന്റ് ജൂലൈ 16 മുതൽ ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് എത്തിത്തുടങ്ങും. പണപ്പെരുപ്പം കണക്കിലെടുത്ത് ആനുകൂല്യത്തിൽ 2.1 ശതമാനം വർധനവാണ് സർക്കാർ പ്രഖ്യാപിച്ചിരിക്കുന്നത്.
പുതിയ നിരക്കുപ്രകാരം പ്രതിമാസ പരമാവധി ആനുകൂല്യം 200 ഡോളറിൽ നിന്ന് 204.20 ഡോളറായും വാർഷിക പരമാവധി തുക 2,400 ഡോളറിൽ നിന്ന് 2,450.40 ഡോളറായും ഉയരും. 18 മുതൽ 64 വയസ്സ് വരെയുള്ള അർഹരായ ആറു ലക്ഷത്തിലധികം കനേഡിയൻ പൗരന്മാർക്കാണ് ഈ ആനുകൂല്യം ലഭിക്കുക.
2025-ലെ ആദായനികുതി രേഖകളുടെ അടിസ്ഥാനത്തിലാണ് നിലവിലെ ആനുകൂല്യത്തുക കണക്കാക്കുന്നത്. അതിനാൽ കഴിഞ്ഞ വർഷത്തെ വരുമാനത്തിൽ മാറ്റമുണ്ടായവരുടെ ആനുകൂല്യത്തുകയിലും വ്യത്യാസം ഉണ്ടാകാൻ സാധ്യതയുണ്ടെന്ന് അധികൃതർ അറിയിച്ചു.
ഭിന്നശേഷി നികുതി ക്രെഡിറ്റ് (Disability Tax Credit – DTC) സർട്ടിഫിക്കറ്റ് നേടുന്നതിനുള്ള ചെലവ് കുറയ്ക്കാൻ സെപ്റ്റംബർ മുതൽ 150 ഡോളറിന്റെ പ്രത്യേക സഹായധനവും സർക്കാർ നൽകും. സെപ്റ്റംബർ 17-ന് ലഭിക്കുന്ന പതിവ് CDB പേയ്മെന്റിനൊപ്പമായിരിക്കും ഈ തുകയും വിതരണം ചെയ്യുക. നിലവിൽ ആനുകൂല്യം ലഭിക്കുന്നവർക്ക് ഇതിനായി പ്രത്യേക അപേക്ഷ നൽകേണ്ടതില്ല.
ഒന്റാരിയോ ഉൾപ്പെടെയുള്ള മിക്ക പ്രവിശ്യകളിലും ഈ ആനുകൂല്യം മറ്റ് സാമൂഹിക സഹായ പദ്ധതികളെ ബാധിക്കില്ലെന്ന് സർക്കാർ വ്യക്തമാക്കിയിട്ടുണ്ട്. അർഹതയുണ്ടായിട്ടും ഇതുവരെ അപേക്ഷിക്കാത്തവർക്ക് സർവീസ് കാനഡ വഴി അപേക്ഷ സമർപ്പിക്കാം. അപേക്ഷ അംഗീകരിക്കപ്പെടുന്നവർക്ക് 2025 ജൂൺ മുതൽ മുൻകാല പ്രാബല്യത്തോടെയുള്ള കുടിശ്ശിക തുകയും ലഭിക്കും.
ഭിന്നശേഷിക്കാർക്ക് സാമ്പത്തിക സുരക്ഷ വർധിപ്പിക്കുകയും വർധിച്ചുവരുന്ന ജീവിതച്ചെലവിനെ നേരിടാൻ സഹായിക്കുകയും ചെയ്യുന്നതിന്റെ ഭാഗമായാണ് CDB തുക സർക്കാർ പുതുക്കിയിരിക്കുന്നത്.
