ഓട്ടവ: ദീർഘകാല നവീകരണ പ്രവർത്തനങ്ങൾക്ക് ശേഷം കാനഡയുടെ ഏക പ്രവർത്തനക്ഷമ അന്തർവാഹിനിയായ എച്ച്എംസിഎസ് കോർണർ ബ്രൂക്ക് വീണ്ടും കടലിലിറങ്ങുന്നു. ലോകത്തിലെ ഏറ്റവും വലിയ നാവിക അഭ്യാസമായ ‘റിംപാക്’ (RIMPAC)യിൽ പങ്കെടുക്കുന്നതിനായാണ് സബ്മറൈൻ വീണ്ടും വിന്യാസത്തിനൊരുങ്ങുന്നത്.
ഹവായി തീരത്ത് ജൂൺ 24 മുതൽ ജൂലൈ 31 വരെ നടക്കുന്ന മൾട്ടിനാഷണൽ നാവിക പരിശീലനത്തിൽ കാനഡയുടെ ഈ അന്തർവാഹിനിയും മറ്റ് യുദ്ധക്കപ്പലുകളും പങ്കെടുക്കും. ബ്രിട്ടീഷ് കൊളംബിയയിലെ സൈനിക താവളത്തിൽ നിന്ന് അടുത്ത ദിവസങ്ങളിൽ കപ്പൽ പുറപ്പെടുമെന്നാണ് വിവരം.
2011-ൽ വൻകൂവർ ദ്വീപിന് സമീപം സംഭവിച്ച അപകടത്തെ തുടർന്ന് കോർണർ ബ്രൂക്ക് ദീർഘകാല അറ്റകുറ്റപ്പണികളിലായിരുന്നു. ഏകദേശം 14 വർഷം നീണ്ട നവീകരണത്തിനായി ഏകദേശം 71.5 കോടി കനേഡിയൻ ഡോളറിലധികം ചെലവഴിച്ചതായാണ് റിപ്പോർട്ട്. ഈ കാലയളവിൽ 90,000 മണിക്കൂറിലധികം അറ്റകുറ്റപ്പണികളും സാങ്കേതിക നവീകരണങ്ങളും നടത്തിയിട്ടുണ്ട്.
ആധുനിക ഇലക്ട്രോണിക് യുദ്ധ സംവിധാനങ്ങൾ, മെച്ചപ്പെടുത്തിയ നിരീക്ഷണ സംവിധാനങ്ങൾ, പുതിയ ബാറ്ററി സാങ്കേതികവിദ്യ എന്നിവ ഉൾപ്പെടുത്തി സബ്മറൈനെ ആധുനിക യുദ്ധ സാഹചര്യങ്ങൾക്ക് അനുയോജ്യമായ രീതിയിൽ നവീകരിച്ചു.
റിംപാക് അഭ്യാസത്തിൽ കാനഡയുടെ എച്ച്എംസിഎസ് റജീന, എച്ച്എംസിഎസ് ഓട്ടവ എന്നീ ഫ്രിഗേറ്റുകളും അസ്റ്റെറിക്സ് എന്ന റീപ്ലെനിഷ്മെന്റ് കപ്പലും പങ്കെടുക്കും. കൂടാതെ വ്യോമസേനയുടെ പട്രോളിംഗ് വിമാനങ്ങളും ഹെലികോപ്റ്ററുകളും ഉൾപ്പെടെ ഏകദേശം 800 കനേഡിയൻ സൈനികരും ദൗത്യത്തിന്റെ ഭാഗമാകും.
അമേരിക്കൻ പസഫിക് ഫ്ലീറ്റിന്റെ നേതൃത്വത്തിൽ നടക്കുന്ന ഈ അഭ്യാസത്തിൽ 31 രാജ്യങ്ങളിൽ നിന്നായി 40 യുദ്ധക്കപ്പലുകളും 5 സബ്മറൈനുകളും 140 വിമാനങ്ങളും 25,000-ത്തിലധികം സൈനികരും പങ്കെടുക്കും. ടോർപ്പിഡോ പ്രയോഗം, മിസൈൽ പരിശീലനം, സബ്മറൈൻ പ്രതിരോധ പ്രവർത്തനങ്ങൾ എന്നിവയാണ് പ്രധാന ആകർഷണങ്ങൾ.
1971 മുതൽ റിംപാക് അഭ്യാസത്തിൽ പങ്കാളിയായ കാനഡ, ഇന്തോ-പസഫിക് മേഖലയിലെ പ്രതിരോധ സഹകരണം ശക്തിപ്പെടുത്തുന്നതിന്റെ ഭാഗമായാണ് ഈ വർഷവും ശക്തമായ സാന്നിധ്യം ഉറപ്പാക്കുന്നത്.
