ഗ്രാമീണ മേഖലകളിലെ സ്ഥിരതാമസ പദ്ധതി; ബ്രിട്ടിഷ് കൊളംബിയയില്‍ അപേക്ഷകരുടെ വന്‍ തിരക്ക്

ഓട്ടവ: കാനഡയിലെ ചെറുകിട, ഗ്രാമീണ മേഖലകളിലെ തൊഴില്‍ക്ഷാമം പരിഹരിക്കാന്‍ ലക്ഷ്യമിട്ടുള്ള ‘റൂറല്‍ കമ്മ്യൂണിറ്റി ഇമിഗ്രേഷന്‍ പൈലറ്റ്’ (RCIP) പദ്ധതിയിലേക്ക് അപേക്ഷകരുടെ തിരക്ക്. ഈ വര്‍ഷത്തെ ആദ്യ രണ്ട് മാസങ്ങളില്‍ മാത്രം എണ്ണൂറോളം പേര്‍ക്ക് ഈ പ്രോഗ്രാമിലൂടെ കാനഡയില്‍ സ്ഥിരതാമസത്തിനുള്ള അനുമതി (Permanent Residency) ലഭിച്ചതായി ഔദ്യോഗിക കണക്കുകള്‍ വ്യക്തമാക്കുന്നു. ലഭ്യമായ ഒഴിവുകളേക്കാള്‍ വളരെ കൂടുതലാണ് നിലവില്‍ ലഭിച്ചുകൊണ്ടിരിക്കുന്ന അപേക്ഷകളുടെ എണ്ണം.

2025-ല്‍ ആരംഭിച്ച ആര്‍.സി.ഐ.പി (RCIP) പദ്ധതി പ്രകാരം കാനഡയിലെ 14 ചെറുകിട കമ്മ്യൂണിറ്റികള്‍ക്കാണ് തങ്ങളുടെ പ്രദേശത്തെ തൊഴില്‍ മേഖലകളിലേക്ക് ആവശ്യമായ വിദഗ്ദ്ധ തൊഴിലാളികളെ സ്ഥിരതാമസത്തിനായി ശുപാര്‍ശ ചെയ്യാന്‍ അനുമതിയുള്ളത്. ഹെല്‍ത്ത് കെയര്‍, മാനുഫാക്ചറിംഗ്, സ്‌കില്‍ഡ് ട്രേഡുകള്‍, ട്രാന്‍സ്‌പോര്‍ട്ട് തുടങ്ങി വിവിധ മേഖലകളില്‍ നിന്നുള്ള 25 തൊഴിലുകള്‍ വരെ ഓരോ കമ്മ്യൂണിറ്റിക്കും മുന്‍ഗണനാ പട്ടികയില്‍ ഉള്‍പ്പെടുത്താം.

ബ്രിട്ടീഷ് കൊളംബിയയിലെ നോര്‍ത്ത് ഒകനഗന്‍ ഷൂസ്വാപ്പ് (North Okanagan Shuswap) മേഖലയില്‍ നിന്ന് മാത്രം കഴിഞ്ഞ വര്‍ഷം 340 പേരെ സ്ഥിരതാമസത്തിനായി ശുപാര്‍ശ ചെയ്തിരുന്നു. ഇതില്‍ 90 പേര്‍ക്ക് ഫെബ്രുവരി 28 ഓടെ പി.ആര്‍ (PR) പദവി ലഭിച്ചതായി പ്രോഗ്രാം മാനേജര്‍ വാര്‍ഡ് മെര്‍സര്‍ പറഞ്ഞു. അപേക്ഷകരുടെ എണ്ണം ലഭ്യമായ സീറ്റുകളേക്കാള്‍ വളരെ കൂടുതലായതിനാല്‍, അതാത് പ്രദേശങ്ങളില്‍ ഏറ്റവും കൂടുതല്‍ ആള്‍ക്ഷാമം നേരിടുന്ന തൊഴിലുകളെ തന്ത്രപരമായി മുന്‍ഗണനാ പട്ടികയില്‍ ഉള്‍പ്പെടുത്തേണ്ട അവസ്ഥയാണെന്ന് അദ്ദേഹം വ്യക്തമാക്കി. നോര്‍ത്ത് ഒകനാഗന്‍ മേഖലയില്‍ നിലവില്‍ ചൈല്‍ഡ് കെയര്‍ എഡ്യൂക്കേറ്റര്‍മാര്‍, ഓട്ടോ മെക്കാനിക്കുകള്‍, കണ്‍സ്ട്രക്ഷന്‍ തൊഴിലാളികള്‍, സോഷ്യല്‍ വര്‍ക്കര്‍മാര്‍ എന്നിവര്‍ക്കാണ് വലിയ ഡിമാന്‍ഡുള്ളത്.

പ്രായമായവരും വിരമിച്ചവരും കൂടുതലായി താമസിക്കുന്ന നോര്‍ത്ത് ഒകനാഗന്‍ പോലുള്ള പ്രദേശങ്ങളില്‍ പ്രാദേശികമായി തൊഴിലാളികളെ ലഭിക്കാത്തതാണ് വിദേശ തൊഴിലാളികളെ ആശ്രയിക്കാന്‍ കാരണം. അതേസമയം, കാനഡയിലെ യുവാക്കള്‍ക്കിടയിലെ തൊഴിലില്ലായ്മ നിരക്ക് മെയ് മാസത്തില്‍ 13.4 ശതമാനമായി ഉയര്‍ന്ന സാഹചര്യത്തില്‍, പ്രാദേശിക യുവാക്കള്‍ക്ക് കൂടുതല്‍ തൊഴിലവസരങ്ങള്‍ നല്‍കണമെന്ന വാദവും ശക്തമാണ്.

ഫെഡറല്‍ സര്‍ക്കാര്‍ പൊതുവായ കുടിയേറ്റ നിയമങ്ങളില്‍ വരുത്തിയ നിയന്ത്രണങ്ങളാണ് ഇത്തരം പ്രാദേശിക പൈലറ്റ് പ്രോഗ്രാമുകളിലേക്ക് അപേക്ഷകര്‍ കൂട്ടത്തോടെ തിരിയാന്‍ കാരണം. കാനഡയിലാകെ ഇത്തരം ആറ് സാമ്പത്തിക കുടിയേറ്റ പൈലറ്റ് പദ്ധതികളിലായി 2026-ല്‍ ആകെ 8,200 പി.ആര്‍ (PR) സീറ്റുകളാണ് അനുവദിച്ചിട്ടുള്ളത്. അപേക്ഷകരുടെ എണ്ണം വര്‍ദ്ധിച്ചതോടെ പലര്‍ക്കും കാനഡയില്‍ തുടരുന്ന കാര്യത്തില്‍ അനിശ്ചിതത്വം നേരിടുന്നുണ്ടെന്നും, കുറഞ്ഞ സീറ്റുകള്‍ മാത്രമുള്ള സാഹചര്യത്തില്‍ അപേക്ഷകര്‍ ചൂഷണങ്ങള്‍ക്ക് ഇരയാകാന്‍ സാധ്യതയുണ്ടെന്നും പ്രാദേശിക അധികൃതര്‍ ആശങ്ക പ്രകടിപ്പിക്കുന്നു.