ഹാലിഫാക്സ്: സമുദ്ര ചരക്കുഗതാഗത മേഖലയിലെ ഹരിത വിപ്ലവത്തിന് വഴിയൊരുക്കി കാറ്റിന്റെ ശക്തി പ്രധാനമായും ഉപയോഗിച്ച് സഞ്ചരിക്കുന്ന ലോകത്തിലെ ഏറ്റവും വലിയ ചരക്കുകപ്പലായ ‘നിയോലൈനർ ഒറിജിൻ’ കാനഡയിലെ ഹാലിഫാക്സ് തുറമുഖത്ത് ആദ്യമായി എത്തിച്ചേർന്നു. തിങ്കളാഴ്ച നടന്ന ഈ സന്ദർശനം ആഗോള സമുദ്രഗതാഗത ചരിത്രത്തിലെ ഒരു സുപ്രധാന നാഴികക്കല്ലായാണ് വിലയിരുത്തപ്പെടുന്നത്.
ഫ്രാൻസിലെ നിയോലൈൻ കമ്പനി വികസിപ്പിച്ച 136 മീറ്റർ നീളമുള്ള ഈ അത്യാധുനിക റോൾ-ഓൺ റോൾ-ഓഫ് (Ro-Ro) കപ്പൽ, പരമ്പരാഗത ചരക്കുകപ്പലുകളെ അപേക്ഷിച്ച് ഇന്ധന ഉപയോഗം 80 ശതമാനത്തിലധികം കുറയ്ക്കാൻ കഴിയുമെന്നാണ് കമ്പനി അവകാശപ്പെടുന്നത്.
ലോക വ്യാപാരത്തിന്റെ 80 ശതമാനത്തിലധികം കടൽമാർഗമാണ് നടക്കുന്നത്. എന്നാൽ ഈ മേഖലയിൽ നിന്നുള്ള കാർബൺ പുറന്തള്ളൽ ആഗോള കാലാവസ്ഥാ വ്യതിയാനത്തിന് വലിയ വെല്ലുവിളിയാണ്. 2023-ലെ കണക്കുകൾ പ്രകാരം ലോകത്തെ മൊത്തം ഹരിതഗൃഹ വാതക പുറന്തള്ളലിന്റെ ഏകദേശം രണ്ട് ശതമാനം സമുദ്ര ചരക്കുഗതാഗത മേഖലയുടേതാണ്. ഈ സാഹചര്യത്തിലാണ് പരിസ്ഥിതി സൗഹൃദ സാങ്കേതികവിദ്യകളുമായി നിയോലൈനർ ഒറിജിൻ രംഗത്തെത്തിയിരിക്കുന്നത്.
കപ്പലിന്റെ ആദ്യ കാനഡ സന്ദർശനത്തോടനുബന്ധിച്ച് പോർട്ട് ഓഫ് ഹാലിഫാക്സ്, പി.എസ്.എ ഹാലിഫാക്സ്, മോണ്ട്ഷിപ്പ് എന്നിവയുടെ സഹകരണത്തോടെ പ്രത്യേക സ്വീകരണ ചടങ്ങ് സംഘടിപ്പിച്ചു. സുസ്ഥിര സമുദ്രഗതാഗതത്തിന്റെ ഭാവിയിലേക്കുള്ള നിർണായക ചുവടുവെപ്പാണ് ഈ കപ്പലെന്ന് ചടങ്ങിൽ പങ്കെടുത്ത പി.എസ്.എ ഹാലിഫാക്സ് മാനേജിംഗ് ഡയറക്ടർ ഡങ്കൻ ഗ്ലാസ് അഭിപ്രായപ്പെട്ടു. പൊതുജനങ്ങൾക്കും കപ്പൽ നേരിൽ കാണാൻ പ്രത്യേക അവസരം ഒരുക്കിയിരുന്നു. ഹാലിഫാക്സ് തുറമുഖത്ത് നടന്ന പൊതുപരിപാടിയിൽ നിരവധി പേർ പങ്കെടുത്തു.
